ବ୍ରହ୍ମପୁର: ୫୦ ହଜାର ଟଙ୍କା ଦାଦାବଟି ନଦେବାରୁ ବ୍ରହ୍ମପୁରର ଜଣେ ଦୋକାନୀଙ୍କୁ ଖଣ୍ଡାଚୋଟ ଖାଇବାକୁ ପଡ଼ିଛି। ଦୁର୍ବୃର୍ତ୍ତମାନେ ସଂପୃକ୍ତ ଦୋକାନୀଙ୍କ ଘର ଭିତରେ ପଶି ତାଙ୍କୁ ଖଣ୍ଡାରେ ହାଣିବା ସହ ଦୋକାନ ଭିତରେ ଥିବା କମ୍ପ୍ୟୁଟର ଓ ପ୍ରିଣ୍ଟର ସହ ବିଭିନ୍ନ ସାମଗ୍ରୀକୁ ମଧ୍ୟ ଖଣ୍ଡାରେ ହାଣି ନଷ୍ଟ କରିଦେଇଛନ୍ତି। ଖବରପାଇ ବଡବଜାର ଥାନା ପୁଲିସ ଘଟଣାସ୍ଥଳରେ ପହଞ୍ଚି ଆହତଙ୍କ ଚିକିତ୍ସା କରାଇବା ସହ ଘଟଣାର ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ ବଡବଜାର ଥାନା ଅନ୍ତର୍ଗତ କୈଳାସନଗରରେ ରହୁଥିବା ଗୋପାଳକୃଷ୍ଣ ପଣ୍ଡା ନିଜ ଘର ଭିତରେ ହିଁ ଏକ ଛୋଟିଆ ଦୋକାନ କରିଛନ୍ତି। ୨ ଦିନ ତଳେ ସେହି ଅଞ୍ଚଳରେ ଜଣେ ଅପରାଧୀ ଗୋପାଳକୃଷ୍ଣଙ୍କୁ ଫୋନ କରି ୫୦ ହଜାର ଟଙ୍କା ଦାଦାବଟି ମାଗିଥିଲେ। ଆମେ ୪ ଜଣ ଫେରାର ଅଛୁ ତେଣୁ ୫୦ ହଜାର ନହେଲେ ୩୦ ହଜାର ଟଙ୍କା ଦେବାକୁ ଫୋନ କରିଥିବା ଅପରାଧୀମାନେ ଗୋପାଳକୃଷ୍ଣଙ୍କୁ କହିଥିଲେ। ଏତେ ଟଙ୍କା କେଉଁଠୁ ଆଣିବି ବୋଲି ଗୋପାଳକୃଷ୍ଣ ଉତ୍ତର ଦେବାରୁ ତୁମେ ଦୋକାନ କରିଛ ପୁଅ ଚାକିରି କରି ଆଉ ଟଙ୍କା ନାହିଁ କହୁଛ ବୋଲି ଅପରାଧୀ ଜଣଙ୍କ କହିଥିଲେ। ସେହିପରି ଯଦି ଏହି ଦାଦାବଟି ବିଷୟରେ କାହାକୁ କହିଲେ ପରିଣାମ ଭୋଗିବାକୁ ପଡ଼ିବ ବୋଲି ଅପରାଧୀମାନେ ଚେତାବନୀ ଦେଇଥିଲେ।
ତେବେ ଅପରାଧୀଙ୍କ ଡରରେ ଗୋପାଳ କାହାକୁ କିଛି ନକହି ଚୁପଚାପ ରହିଯାଇଥିଲେ। ହେଲେ ଆଜି ଅପରାହ୍ନ ୫ଟା ବେଳେ ୨ ଜଣ ଯୁବକ ୨ଟି ଖଣ୍ଡା ଧରି ଗୋପାଳକୃଷ୍ଣଙ୍କ ଦୋକାନ ଭିତରକୁ ପଶି ଟଙ୍କା କାହିଁକି ଦେଲୁନୁ ବୋଲି ପଚାରିଥିଲେ। ଗୋପାଳକୃଷ୍ଣ କିଛି କହିବା ପୂର୍ବରୁ ସେମାନେ ତାଙ୍କ ଉପରକୁ ଖଣ୍ଡାରେ ଆକ୍ରମଣ କରିଥିଲେ। ଏହାର ପ୍ରତିରୋଧ କରିବାକୁ ଖଣ୍ଡାଟି ଗୋପାଳକୃଷ୍ଣଙ୍କ ଡାହାଣ ହାତରେ ବାଜିବା ସହ ସେ ଆହତ ହୋଇଥିଲେ। ଆଉ ତୁରନ୍ତ ଘର ଭିତରକୁ ଦୌଡି ଯାଇ କବାଟ ବନ୍ଦ କରି ଦେଇଥିଲେ। ଏହାପରେ ଦୁବୃର୍ତ୍ତମାନେ ଦୋକାନ ଭିତରେ ଥିବା ବିଭିନ୍ନ ସାମଗ୍ରୀକୁ ହାଣିବା ପରେ ଫେରାର ହୋଇଯାଇଥିଲେ।
ଖବରପାଇ ବଡବଜାର ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା। ଦୋକାନ ଭିତରେ ଲାଗିଥିବା ସିସିଟିଭି ଫୁଟେଜକୁ ପୁଲିସ ଯାଞ୍ଚ କରି ଅପରାଧୀଙ୍କୁ ଚିହ୍ନଟ କରିବାକୁ ପ୍ରୟାସ ଜାରି ରଖିଛି। ଫୋନ କରିଥିବା ଅପରାଧୀ ଜଣଙ୍କ ରାନୀ ପଣ୍ଡା ବୋଲି ଗୋପାଳକୃଷ୍ଣ ଅଭିଯୋଗ କରିଛନ୍ତି। ପୂର୍ବରୁ ବିଭିନ୍ନ ଅପରାଧରେ ଜଡ଼ିତ ହୋଇ ଏକାଧିକ ଥର ଗିରଫ ହୋଇଥିବା ରାନୀ ପଣ୍ଡାର ଏଭଳି କାରନାମା ସେହି ଅଞ୍ଚଳର ବ୍ୟବସାୟୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରିଛି।
Comments are closed.