ସମାଜ ଡିଜିଟାଲ ଡେସ୍କ : ଗଞ୍ଜାମ ଜିଲ୍ଲାର ଅନ୍ୟତମ ଜୀବନରେଖା ଭାବେ ବିବେଚିତ ଋଷିକୂଲ୍ୟା ନଦୀକୁ ବାଲି ମାଫିଆମାନଙ୍କ କବଳରୁ ରକ୍ଷା କରିବାକୁ ଲୋକଶକ୍ତି ଅଭିଯାନ ଓ ସେଣ୍ଟର ଫର କ୍ଳାଇମେଟ ଜଷ୍ଟିସର ଆବାହକ ପ୍ରଫୁଲ୍ଲ ସାମନ୍ତରା ସରକାରଙ୍କ ନିକଟରେ ଦାବି କରିଛନ୍ତି। ସୋମବାର ଏକ ସାମ୍ବାଦିକ ସମ୍ମିଳନୀରେ ଶ୍ରୀ ସାମନ୍ତରା ବାଲି ମାଫିଆମାନଙ୍କ ଦୌରାତ୍ମ୍ୟ ଯୋଗୁଁଁ ନଦୀକୂଳିଆ ଗ୍ରାମବାସୀମାନଙ୍କ ଜୀବନ ଜୀବିକା ପ୍ରଭାବିତ ହୋଇଥିବା ଏବଂ ବାଲି କାଢି ନିଆଯିବା ଦ୍ୱାରା ଋଷିକୂଲ୍ୟା ନଦୀପଠାରେ ଥିବା ଦୁଇଟି ଜଳ ଉତ୍ତୋଳନ ପଏଣ୍ଟ ଯୋଗେ ଉପଲବ୍ଧ ଜଳ ଲୁଣିଆ ହୋଇଥିବା ସେ ଅଭିଯୋଗ କରିଛନ୍ତି। ଋଷିକୁଲ୍ୟା ନଦୀ ନିକଟ ଗଞ୍ଜାମ ଜିଲ୍ଲାର ପାଣ୍ଡିଆ, ବାଲିଆ, କଲ୍ୟାଣପୁର, ହଂସପୁର, ବଡ଼ମାଧପୁର ଇତ୍ୟାଦି ବାଲିଘାଟର ଲିଜ ଧାରକମାନେ ମାଫିଆ ନିୟୋଜିତ କରିଥିବାରୁ ବାଲି ଚୋରା ଚାଲାଣ ଓ ଅସାମାଜିକ କାର୍ଯ୍ୟ କଳାପକୁ ସ୍ଥାନୀୟ ଲୋକ ପ୍ରତିବାଦ କରିବା ବିପଦପୂର୍ଣ୍ଣ ହୋଇଛି। ଏଣୁ ରାଜ୍ୟ ସରକାର ଜିଲ୍ଲା ପ୍ରଶାସନ ଓ ପୁଲିସ ବିଭାଗର ସମନ୍ୱୟରେ ଏକ ଟାସ୍କଫୋର୍ସ ଗଠନ କରି ପରିସ୍ଥିତି ନିୟନ୍ତ୍ରଣ କରିବା ଏବଂ ସିସିଟିଭି କ୍ୟାମେରା ବ୍ୟବସ୍ଥା କରି ବାଲି ଚୋରା ଚାଲାଣ ରୋକିବାକୁ ସେ ସରକାରଙ୍କଠାରେ ଦାବି କରିଛନ୍ତି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଓ ଜାତୀୟ ସବୁଜ ପ୍ରାଧିକରଣଙ୍କ କଟକଣା ପ୍ରତି ମଧ୍ୟ ରାଜ୍ୟ ସରକାର ଯତ୍ନବାନ ହେବାକୁ ସେ ପରାମର୍ଶ ଦେଇଛନ୍ତି।
Popular Categories
Previous article
Next article