ବେଗୁନିଆ: ବାଘମାରୀ ଥାନା ଅନ୍ତର୍ଗତ ଖୋର୍ଦ୍ଧା ବଲାଙ୍ଗୀର ୫୭ ନଂ ଜାତୀୟ ରାଜପଥର ବାଘମାରୀ ଏବଂ ସାରୁଅ ମଝିରେ ଗତକାଲି ରାତିରେ ଦୁଇଟି ବାଇକ ମଧ୍ୟରେ ମୁହାଁ ମୁହିଁ ଧକ୍କା ହେବା ଯୋଗୁଁ ଘଟଣାସ୍ଥଳରେ ଜଣେ ମୃତ୍ୟୁ ବରଣ କରିଥିବାବେଳେ ବାଇକ ଦୁଇଟିର ଚାଳକ ଗୁରୁତର ଭାବେ ଆହତ ହୋଇ ଚିକିତ୍ସିତ ହେଉଛନ୍ତି। ଇଟାମାଟିର ରାମ ପ୍ରଧାନ ଏବଂ ଟୁନା ବାରିକ ଏକ ବୁଲେଟରେ ନିଜ ଗ୍ରାମ ଅଭିମୁଖେ ଯାଉଥିବାବେଳେ ସମ୍ବଲପୁରର ଅଜୟ ପ୍ରଧାନ ଏକ ପଲସର ବାଇକରେ ଖୋର୍ଦ୍ଧା ଅଭିମୁଖେ ଯାଉଥିଲେ। ଉଭୟ ବାଇକ ଦ୍ରୁତ ଗତିରେ ଯାଉଥିବାବେଳେ ବାଘମାରୀ ଏବଂ ସାରୁଅ ମଝିରେ ଦୁର୍ଘଟଣା ଘଟିଥିଲା। ଫଳରେ ୩ ଜଣ ଯାକ ଫୋପାଡ଼ି ହୋଇ ତଳେ ପଡ଼ିଥିଲେ। ବୁଲେଟରେ ଯାଉଥିବା ଟୁନା ବାରିକ ଘଟଣାସ୍ଥଳରେ ମୃତ୍ୟୁ ବରଣ କରିଥିବା ବେଳେ ବାଇକ ଦୁଇଟିର ଚାଳକ ଗୁରୁତରଭାବେ ଆହତ ହୋଇଥିଲେ।
ଖବର ପାଇ ବାଘମାରୀ ଥାନା ଏସଆଇ ବ୍ରହ୍ମାନନ୍ଦ ସ୍ୱାଇଁ ଘଟଣାସ୍ଥଳରେ ପହଞ୍ଚି ୩ ଜଣଙ୍କୁ ଖୋର୍ଦ୍ଧା ଡାକ୍ତରଖାନାକୁ ପଠାଇଥିଲେ। ଡାକ୍ତର ସେଠାରେ ଟୁନା ବାରିକଙ୍କୁ ମୃତ ଘୋଷଣା କରିଥିବା ବେଳେ ଅନ୍ୟ ଦୁଇଜଣଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି। ବାଇକ ଦୁଇଟି ଜବତ କରି ଥାନାକୁ ଆଣିଥିବାବେଳେ ଏକ ମାମଲା ରୁଜୁ କରି ଘଟଣାର ତଦନ୍ତ ଜାରି ରହିଛି।
