ଭୁବନେଶ୍ୱର : ରସୁଲଗଡ଼ସ୍ଥିତ ଓ’ ବ୍ରେନ୍ ସେଣ୍ଟରର ୨୫ ବର୍ଷ ପୂର୍ତ୍ତି ଅବସରରେ କମର୍ସ ଅନଲାଇନ୍ ପ୍ରକଳ୍ପର ଶୁଭାରମ୍ଭ ହୋଇଛି । ଏହି ଅବସରରେ ଓ’ ବ୍ରେନ୍ ର ନିର୍ଦ୍ଦେଶକ ସରୋଜ ବିଶ୍ୱାଳ ତାଙ୍କର ସ୍ୱପ୍ନକୁ ସାକାର କରିଛନ୍ତି । ସେ ଆସନ୍ତା ମାସ ଠାରୁ ଯୁକ୍ତ ୨ ଓ ଯୁକ୍ତ ୩ ଛାତ୍ରଛାତ୍ରୀଙ୍କୁ ଅନଲାଇନ୍ ଡିଜିଟାଲ୍ ଷ୍ଟୁଡିଓ ମାଧ୍ୟମରେ ସାରା ଓଡ଼ିଶାରେ ପାଠ ପଢ଼ାଇବାକୁ ପ୍ରଚେଷ୍ଟା କରୁଛନ୍ତି । ମାସକୁ ମାତ୍ର ୨ଠଠ ଟଙ୍କା ଦେଇ ଛାତ୍ରଛାତ୍ରୀମାନେ ପାଠ ପଢ଼ିପାରିବେ । ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ ସମସ୍ତ ପିଲା ଉପକୃତ ହୋଇ ପାରିବେ ।
ଏହି ଉତ୍ସବରେ ମୁଖ୍ୟ ଅତିଥି ଭାବେ ସେଣ୍ଟ୍ରାଲ୍ ଏକ୍ସାଇଜ୍ ଅବସରପ୍ରାପ୍ତ ଅଧିକାରୀ ଚିତ୍ତରଞ୍ଜନ ଶାସ୍ତ୍ରୀ, ସମ୍ମାନିତ ଅତିଥି ଭାବେ ଅନ୍ତର୍ଜାତୀୟ ମାନବାଧିକାର ଫୋରମ୍ ଅଧ୍ୟକ୍ଷ ସୁବାସିନୀ ଭୋଳ ପ୍ରମୁଖ ଉପସ୍ଥିତ ଥିଲେ । ନିର୍ଦ୍ଦେଶକ ଶ୍ରୀ ବିଶ୍ୱାଳ କହିଥିଲେ ଯେ ତାଙ୍କର ଛାତ୍ରଛାତ୍ରୀମାନେ ବହୁ କମ୍ପାନୀ ଓ ବ୍ୟାଙ୍କିଂ ସେକ୍ଟରର ଉଚ୍ଚ ପଦପଦବୀରେ ନିଯୁକ୍ତି ପାଇଛନ୍ତି । ଏହାଛଡ଼ା ୬୫ ଜଣ ଚାଟାର୍ଡ ଆକାଉଣ୍ଟାଣ୍ଟ, ୩୮ଜଣ କଷ୍ଟ୍ ଆକାଉଣ୍ଟାଣ୍ଟ, ୮ ଜଣ କମ୍ପାନୀ ସେକ୍ରେଟାରୀ, ୫ ଜଣ ଗୋଲ୍ଡ ମେଡାଲିଷ୍ଟ୍, ୪୨ ଜଣ ଯୁକ୍ତ ୨ ଟପ୍ପର, ୫ଜଣ ଯୁକ୍ତ ୩ ଟପ୍ପର ହୋଇଥିବା ଜଣାପଡ଼ିଛି । ନିମନ୍ତ୍ରିତ ଅତିଥି ମାନେ ଏହି ଅନୁଷ୍ଠାନର ଛାତ୍ରଛାତ୍ରୀଙ୍କର ଉତ୍ତରୋତ୍ତର ଉନ୍ନତି କାମନା କରିଥିଲେ ।
