ସିମୁଳିଆ: ବାଲେଶ୍ୱର ଜିଲା ସିମୁଳିଆ ବିଡ଼ିଓ ବିଶ୍ୱରଞ୍ଜନ ମହାନ୍ତିଙ୍କ ଝୁଲନ୍ତା ମୃତଦେହ ତାଙ୍କ ସରକାରୀ ବାସଭବନରୁ ଗୁରୁବାର ଉଦ୍ଧାର ହୋଇଛି। ବିଡ଼ିଓଙ୍କ ମୃତ୍ୟୁ ହୋଇଥିବା ଜଣାପଡିବା ପରେ ପୁଲିସ ଓ ସାଇଣ୍ଟିଫିକ ଦଳ ଘଟଣା ସ୍ଥଳରେ ପହଂଚି ଛାନଭିନ ଆରମ୍ଭ କରିଛନ୍ତି। ମୃତ୍ୟୁର କାରଣ ଆତ୍ମହତ୍ୟା ନା ଆଉ କିଛି ସେନେଇ ପୁଲିସ ବିଭିନ୍ନ ଦିଗରୁ ତଦନ୍ତ କରୁଥିବା ଜଣାପଡିଛି।
ସୂଚନା ଅନୁସାରେ ଗତ ଅକ୍ଟୋବର ୨୬ତାରିଖରେ ବିଶ୍ୱରଞ୍ଜନ ମହାନ୍ତି ପ୍ରଥମ କରି ବିଡ଼ିଓ ଭାବେ ସିମୁଳିଆ ବ୍ଲକରେ ଯୋଗ ଦେଇଥିଲେ। ଏହା ପୂର୍ବରୁ ସେ ମୟୂରଭଞ୍ଜ ଜିଲା ଗୋପବନ୍ଧୁନଗର ବ୍ଲକର ତହସିଲଦାର ଥିଲେ। ଏଠାରେ ବିଡ଼ିଓ ଭାବେ ଯୋଗଦେବାର ଅଳ୍ପ ଦିନ ମଧ୍ୟରେ ସେ ବହୁ ଅନୁଷ୍ଠାନ ଓ ସାଧାରଣ ଲୋକଙ୍କ ସହ ଯୋଡି ହୋଇଥିଲେ। ଗୁରୁବାର ବ୍ଲକ କାର୍ଯ୍ୟଳୟକୁ ଦିନ ୧୦ଟାରେ ଯାଇଥିଲେ ଏବଂ ଦିନ ୧୨ଟା ସମୟରେ ଶୌଚ ହେବା ନିମନ୍ତେ ସରକାରୀ ବାସଭବନକୁ ଆସିଥିଲେ। ଦିନ ୧ଟାରେ ଜିଲାପାଳଙ୍କ ଭିଡ଼ିଓ କନଫରେନ୍ସ ଥିବାବେଳେ ଏଥିରେ ସେ ଯୋଗ ଦେଇନଥିଲେ। ଅପରାହ୍ନରେ ବ୍ଲକ କର୍ମଚାରୀମାନେ ତାଙ୍କ ବାସଭବନକୁ ଆସି ଦେଖିଥିଲେ ଯେ ଭିତରପଟୁ ଫାଟକରେ ତାଲା ପଡିଥିଲା। ସନ୍ଦେହ ହେବାରୁ ସିମୁଳିଆ ତହସିଲଦାର ସୁନୀଲ କୁମାର ଟୁଡୁ, ବ୍ଲକ ଅଧ୍ୟକ୍ଷ ବାବାଜୀ ଚରଣ ମଲ୍ଲିକ ଏବଂ ଅନ୍ୟ କର୍ମଚାରୀଙ୍କ ଉପସ୍ଥିତିରେ ତାଲା ଭଙ୍ଗାଯିବାରୁ ବିଡ଼ିଓଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା।
ଖବର ପାଇ ସିମୁଳିଆ ପୁଲିସ ଓ ବାଲେଶ୍ୱର ସାଇଣ୍ଟିଫିକ ଦଳ ଘଟଣାସ୍ଥଳରେ ପହଂଚି ଛାନଭିନ ଆରମ୍ଭ କରିଛନ୍ତି। ବିଡ଼ିଓଙ୍କ ମୃତ୍ୟୁ ହତ୍ୟାଜନିତ ନା ଆତ୍ମହତ୍ୟା ତାହା ସ୍ପଷ୍ଟ ହୋଇନାହିଁ ପୁଲିସର ତଦନ୍ତ ପରେ ପ୍ରକୃତ ରହସ୍ୟ ଜଣାପଡିବ ବୋଲି କୁହାଯାଇଛି। ତେବେ ବିଡ଼ିଓଙ୍କ ବାପା ଅଭିଯୋଗ କରିଛନ୍ତି ଯେ ସିମୁଳିଆରେ କାର୍ଯ୍ୟରେ ଯୋଗଦେବା ପରେ ତାଙ୍କ ପୁଅକୁ ଜିଲାପାଳ ଛୁଟି ଦେଉନଥିଲେ। ତେଣୁ ସେ ଅଧିକ ଚାପରେ ଥିଲେ। ଏପରିକି ସେ ସିମୁଳିଆ ଯିବା ପରେ ଥରେ ହେଲେ ବି ଘରକୁ ଆସିନାହାଁନ୍ତି। ସେପଟେ ଜିଲାପାଳ କହିଛନ୍ତି ବିଶ୍ୱରଞ୍ଜନ ଛୁଟି ନେବା ପାଇଁ ତାଙ୍କୁ କୌଣସି ଦରଖାସ୍ତ ଦେଇନଥିଲେ ଓ ସ୍ୱାଭାବିକ ଭାବେ କାମ କରୁଥିଲେ।
Comments are closed.