ବଲାଙ୍ଗିର:ବଲାଙ୍ଗିର ଜିଲା ପୁଇଁତଳା ବ୍ଳକ ଫଲସାପଦର ଗ୍ରାମର ଶିବରାଜ ରାଉତ ନାମକ ଜଣେ ଯୁବକ ଗତ ୫ ବର୍ଷ ତଳେ ସେହି ଗ୍ରାମର ୧୬ ବର୍ଷୀୟ ଜଣେ ନାବାଳିକାଙ୍କୁ ତାର ସରଳତାର ସୁଯୋଗ ନେଇ ବଳପୂର୍ବକ ଦୁଷ୍କର୍ମ କରିଥିଲେ। ଏହି ଘଟଣା କାହାକୁ କହିଲେ ନାବାଳିକାକୁ ଜୀବନରେ ମାରିଦେବା ପାଇଁ ଅଭିଯୁକ୍ତ ଧମକ ଦେଇଥିଲେ। ଲୋକଲଜ୍ଜା ଭୟରେ ନାବାଳିକା ଜଣକ ଘଟଣା ପ୍ରଘଟ କରି ନଥିବା ବେଳେ କିଛି ଦିନ ପରେ ନାବାଳିକା ଜଣକ ଗର୍ଭବତୀ ହୋଇଥିଲେ। ନାବାଳିକାର ପରିବାର ଏହି କଥା ଜାଣିବା ପରେ ଶିବରାଜର ବଡ଼ ଭାଇ ପ୍ରେମରାଜଙ୍କୁ ଅଭିଯୋଗ କରିଥିଲେ। ତେବେ ଅଭିଯୁକ୍ତର ବଡ ଭାଇ ପ୍ରେମରାଜ ନିଜ ଭାଇର ଦୋଷ ମାନିବା ପରିବର୍ତ୍ତେ ତୁମେ ଯାହା କରିବା କଥା କର ବୋଲି କହିବା ପରେ ନାବାଳିକାର ପରିବାର ଲୋକେ ପୁଇଁତଳା ଥାନାର ଦ୍ୱାରସ୍ଥ ହୋଇଥିଲେ। ପୁଇଁତଳା ପୁଲିସ ଦୁଷ୍କର୍ମ ଅଭିଯୋଗରେ ଶିବରାଜକୁ ଗିରଫ କରିବା ସହ କୋର୍ଟ ଚାଲାଣ କରିଥିଲେ । ଉଭୟ ପକ୍ଷର ସାକ୍ଷୀ ଓ ପ୍ରମାଣକୁ ଆଧାର କରି ବଲାଙ୍ଗିର ସ୍ୱତନ୍ତ୍ର ବିଚାରପତି ଫାଷ୍ଟ ଟ୍ରାକ କୋର୍ଟ ନିଜ ରାୟରେ ଅଭିଯୁକ୍ତଙ୍କୁ ୨୦ ବର୍ଷ ସଶ୍ରମ କାରାଦଣ୍ଡ ସହ ୫୦ ହଜାର ଟଙ୍କା ଜୋରିମାନା ପଇଠ ପାଇଁ ରାୟ ଶୁଣାଇଛନ୍ତି। ଜୋରିମାନା ଅନାଦେୟ ଆଉ ଦୁଇ ବର୍ଷ ଅଧିକ କାରାଦଣ୍ଡଦେଶ ପାଇଁ ସ୍ୱତନ୍ତ୍ର ବିଚାରପତି ବିରଞ୍ଚି ନାରାୟଣ ମିଶ୍ର ରାୟ ଦେଇଛନ୍ତି। ପୀଡିତାଙ୍କ ପକ୍ଷରୁ ସ୍ୱତନ୍ତ୍ର ସରକାରୀ ଓକିଲ ଜୟରାମ ମିଶ୍ର ମାମଲା ପରିଚାଳନା କରିଥିବା ବେଳେ ଅଭିଯୁକ୍ତଙ୍କ ପକ୍ଷରୁ ଆଇନଜୀବୀ ସୁଶାନ୍ତ ବାଗ ମାମଲା ପରିଚାଳନା କରିଥିଲେ।
Popular Categories
Previous article
Next article