ବଡ଼ମ୍ବାରେ ସରକାରୀ ଜମି ଜବରଦଖଲ ଉଚ୍ଛେଦ

ବଡ଼ମ୍ବା : ବଡ଼ମ୍ବା ବ୍ଲକ ଗମେଇଁ ଗ୍ରାମରେ ନଦୀବନ୍ଧକୁ ଲାଗି ରହିଥିବା ଜଳସେଚନ ବିଭାଗ ଜମିରେ ବହୁଦିନ ଧରି ଜବର ଦଖଲରେ ଥିବା ୩୨ ଗୋଟି ଘରକୁ ସ୍ଥାନୀୟ ପ୍ରଶାସନ ତରଫରୁ ଉଚ୍ଛେଦ କରାଯାଇଛି । ସୂଚନା ଥାଉକି ଗମେଇଁ ଗ୍ରାମ ମହାନଦୀ ନଦୀବନ୍ଧକୁ ଲାଗିଥିବା ଜଳସେଚନ ବିଭାଗ ଜମିରେ ଗମେଇଁ ଗ୍ରାମର କିଛି ଗୋଷ୍ଠୀ ବହୁଦିନ ଧରି ପକ୍କାଘର ନିର୍ମାଣ କରିଥିବା ବେଳେ ଗ୍ରାମବାସୀଙ୍କ ତରଫରୁ  ପ୍ରଶାସନ ପାଖରେ ଏନେଇ ବହୁବାର ଅଭିଯୋଗ କରାଯାଇଥିଲା। ବୁଧବାର ସ୍ଥାନୀୟ ପ୍ରଶାସନ ଏହି ଘଟଣାରେ ହସ୍ତକ୍ଷେପ କରିଥିଲେ । ବଡ଼ମ୍ବା ତହସିଲଦାର ନୀଳକଣ୍ଠ ବେହେରା, ବିଭାଗୀୟ କନିଷ୍ଠ ଯନ୍ତ୍ରୀ ପଞ୍ଚାନନ ସାହୁ ଘଟଣା ସ୍ଥଳରେ ପହଞ୍ଚି ସଂପୃକ୍ତ ଜବର ଦଖଲକାରୀଙ୍କୁ ବିବାଦୀୟ ଜମିରୁ ଉଚ୍ଛେଦ କରିଥିଲେ। ପୁଲିସ ଅଧିକାରୀ ସତ୍ୟନାରାୟଣ ପାଢ଼ିଙ୍କ ସମେତ ରାଜସ୍ୱ ନିରୀକ୍ଷକ ରମେଶ ଦେହୁରୀ ଓ ରମେଶ ସାହୁ, ରାଜସ୍ୱ ସହାୟକ ଶୈଳେନ୍ଦୁ ଶେଖର ନାୟକ, ଅମିନ ଚକ୍ରଧର ଦାସ, ଦେବେନ୍ଦ୍ରନାଥ ବାରିକ ପ୍ରମୁଖ ଏହି ଉଚ୍ଛେଦ କାର୍ଯ୍ୟରେ ସହଯୋଗ କରିଥିଲେ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ମୃଦୁ ଉତ୍ତେଜନା ଦେଖିବାକୁ ମିଳିଥିଲା ।

Comments are closed.