ଘଣ୍ଟେଶ୍ୱର ଅଞ୍ଚଳରେ ଶାନ୍ତି ଫେରାଇ ଆଣିବା ଦାବି ମହଙ୍ଗା ପଡିଲା, ଆଞ୍ଚଳିକ ସୁରକ୍ଷା ମହାସଂଘ ସଭାପତିଙ୍କୁ ଆକ୍ରମଣ

ଧାମରା  : ଘଣ୍ଟେଶ୍ବର ଅଞ୍ଚଳରେ ଅସାମାଜିକ କାର୍ଯ୍ୟକଳାପ ବଢି ବଢି ଚାଲିଥିବାବେଳେ ଏହି ଅଂଚଳରେ ଶାନ୍ତି ପ୍ରତିଷ୍ଠା ପାଇଁ ଉଦ୍ୟମ କରିଥିବା ଜଣେ ସାମାଜିକ କର୍ମୀଙ୍କୁ ଗତକାଲି ରାତିରେ ମରଣାତ୍ମକ ଆକ୍ରମଣ ହୋଇଛି । ପ୍ରାପ୍ତ ଖବରରୁ ଘଂଟେଶ୍ୱର ଆଂଚଳିକ ସୁରକ୍ଷା ମହାସଂଘର ସଭାପତି ଅଞ୍ଜନ ଦାସ ଓ ତାଙ୍କ ପୁତୁରା ଗତକାଲି ଖଦାଳପୋଖରୀ ଗ୍ରାମରୁ ଫେରୁଥିବା ବେଳେ କଣ ପାଇଁ ଆମ ପଛରେ ପଡିଛ ବୋଲି କହି ୫-୬ ଜଣ ଅସାମାଜିକ ଯୁବକ ଆସି କୋଦାଳ ବେଣ୍ଟ ଏବଂ ବାଉଁଶରେ ଅତର୍କିତ ଆକ୍ରମଣ କରିଥିଲେ । ଏହି ଆକ୍ରମଣରେ ଅଞ୍ଜନ ଦାସ ଏବଂ ତାଙ୍କ ପୁତୁରା ବନ୍ଦନ ଦାସ ଆହତ ହୋଇଥିଲେ । ପରେ ବନ୍ଦନ ଦାସଙ୍କୁ ଭଦ୍ରକର ଏକ ଘରୋଇ ନର୍ସିଂହୋମରେ ଚିକିତ୍ସା ପାଇଁ ଭର୍ତ୍ତି କରାଯାଇଥିବା ବେଳେ ଅଞ୍ଜନ ଦାସ ସାମାନ୍ୟ ଆହାତ ହୋଇଥିଲେ । ପରେ ଦାସ ଆସି ବାଂଶଡା ଥାନାରେ ଏକ ଲିଖିତ ଅଭିଯୋଗ କରିଥିଲେ । ମାତ୍ର ସଂପୃକ୍ତ ଆକ୍ରମଣକାରୀ ଯୁବକ ମାନେ ଶାସକ ଦଳର କର୍ମୀ ବୋଲି ସେମାନଙ୍କୁ ଗିରଫ କରାଯାଉ ନାହିଁ ବୋଲି ଅଞ୍ଜନ ଦାସ ଅଭିଯୋଗ କରିଛନ୍ତି । ଖବର ଲେଖା ହେବା ପର୍ଯ୍ୟନ୍ତ କାହାରିଙ୍କୁ ଗିରଫ କରାଯାଇ ନଥିବାବେଳେ ଏହି ମରଣାତ୍ମକ ଆକ୍ରମଣକୁ ବିଭିନ୍ନ ମହଲରୁ ନିନ୍ଦା କରାଯାଇଛି । ଚାନ୍ଦବାଲି ନିର୍ବାଚନ ମଣ୍ଡଳୀ ନେତା ଦିଗମ୍ବର ଦାସ ନିଜ ପ୍ରତିକ୍ରିୟା ରଖି କୁହନ୍ତି ଘଂଟେଶ୍ୱର ଅଂଚଳରେ ଅଶାନ୍ତ ବାତାବରଣ ସୃଷ୍ଟି ହୋଇଛି । ତୁରନ୍ତ ପ୍ରଶାସନ ଏହାର ମୁକାବିଲା କରିବା ଜରୁରୀ ହୋଇ ପଡିଛି ନଚେତ ଆଗାମୀ ଦିନରେ ଜିଲ୍ଲା ପ୍ରଶାସନ ଏଥି ପାଇଁ ସମ୍ପୂର୍ଣ୍ଣ ଦାୟୀ ରହିବେ । ଅନ୍ୟପଟେ ତୁରନ୍ତ ଶାନ୍ତି କମିଟି ଗଠନ କରାଯିବ ବୋଲି କହିଛନ୍ତି ଆରକ୍ଷୀ ଅଧୀକ୍ଷକ ।