ଜୋରିମାନା ଦେଇ ନପାରିବାରୁୁ ଚାଷୀଙ୍କୁ କାନଧରି ବସଉଠ ଘଟଣା; ତହସିଲଦାରଙ୍କ ନାମରେ ଏତଲା

ଆଠମଲ୍ଲିକ : ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡ ଅନ୍ତର୍ଗତ କିଶୋରନଗର ତହସିଲଦାର ଶନିବାର ମାସ୍କଚେକିଂ ସମୟରେ ଦୁଇଜଣ ଚାଷୀଙ୍କୁ ସଠିକ ଢଙ୍ଗରେ ମାସ୍କ ପରିଧାନ କରିନଥିବା ଯୋଗୁଁ ମଟରସାଇକଲ ଅଟକାଇ ଜଣକା ୫ଶହ ଟଙ୍କା ଜୋରିମାନା ଦିଅ ବୋଲି କହିଥିଲେ ।ଟଙ୍କା ତାଙ୍କ ପାଖରେ ନାହିଁ ବୋଲି କହିବାରୁ ତହସିଲଦାର ସେମାନଙ୍କୁ କାନଧରି ବସଉଠ କରାଇଥିବା ଅଭିଯୋଗ ହୋଇଥିଲା ।ଏ ଘଟଣାରେ ସଂପୃକ୍ତ କିଶୋରନଗର ଥାନା ପାଣ୍ଡୁରୀପଥର ଗ୍ରାମର ଚାଷୀ ମାଗୁଣି ସାହୁ ରବିବାର ତହସିଲଦାର ଲକ୍ଷ୍ମୀପ୍ରସାଦ ସାହୁ ତାଙ୍କୁ ଖରାପଭାଷାରେ ଗାଳିଗୁଲଜ କରିଥିବା ଓ କାନଧରି ବସଉଠ କରାଇଥିବା ଯୋଗୁଁ ଚାଷୀ ସମାଜ ତଥା ଜନସାଧାରଣଙ୍କ ସମ୍ମୁଖରେ ସେ ଅପମାନିତ ହୋଇଥିବା ଓ ତାଙ୍କ ପରିବାର ମାନସିକ ଯନ୍ତ୍ରଣାରେ ଜର୍ଜରିତ ହୋଇଥିବା ନେଇ କିଶୋରନଗର ଥାନାରେ ଏତଲା ଦେଇଥିବା ଜଣାଯାଇଛି ।
ଆଜି ବିଭିନ୍ନ ଗଣମାଧ୍ୟମ ଓ ସାମାଜିକ ଗଣମାଧ୍ୟମରେ ତହସିଲଦାରଙ୍କ ଦବଙ୍ଗଗିରି ସମ୍ପର୍କରେ ଖବର ପ୍ରକାଶିତ ଓ ପ୍ରସାରିତ ହେବାପରେ ଅନୁଗୋଳ ଜିଲାପାଳ ସିଦ୍ଧାନ୍ତ ଶଙ୍କର ସ୍ୱାଇଁ ଘଟଣାର ବିଭାଗୀୟ ତଦନ୍ତ ପାଇଁ ଆଠମଲ୍ଲିକ ଉପଜିଲାପାଳ ଲଳିତମୋହନ ବେହେରାଙ୍କୁ ନିର୍ଦେଶ ଦେଇଥିବା ଜଣାଯାଇଛି ।
ବର୍ତ୍ତମାନ ମୋ ଜୀବନପ୍ରତି ବିପଦ ଦେଖାଯାଇଛି ବୋଲି ମାଗୁଣି ଗଣମାଧ୍ୟମ ଆଗରେ ପ୍ରକାଶ କରିଛନ୍ତି । ଜିଲାପାଳ ଘଟଣାର ତଦନ୍ତ ପାଇଁ ଉପଜିଲାପାଳଙ୍କୁ ନିର୍ଦେଶ ଦେଇଥିବା ବେଳେ ମାଗୁଣି ଏହି ତଦନ୍ତ ନିରପେକ୍ଷ ହେବ ନାହିଁ, ମୁଁ ଯାହା ତଦନ୍ତରେ କହିବି ଜିଲାପାଳ ମହୋଦୟଙ୍କ ସମ୍ମୁଖରେ କହିବି ବୋଲି କହିଛନ୍ତି । ମୁଁ ଜଣେ ଗରିବ ଖଟିଖିଆ ଚାଷୀ, ମୋ ସ୍ୱରକୁ ଚାପିଦେବାକୁ ଚେଷ୍ଟା ଆରମ୍ଭ ହୋଇଗଲାଣି ​ବୋଲି ସେ କହିଛନ୍ତି ।