ଟ୍ରକକୁ ପିଟିଲା ପିକ୍ଅପ୍‌‌ ଭ୍ୟାନ, ଚାଳକ ମୃତ

ଆଠଗଡ : ଆଠଗଡ – ଖୁଣ୍ଟୁଣୀ ୬୫ନମ୍ବର ରାଜ୍ୟ ରାଜପଥର ଦୋରଡ ଓ ଗୋପିନାଥପୁର ମଧ୍ୟବର୍ତ୍ତୀ ଏକ ପେଟ୍ରୋଲ ପମ୍ପ ନିକଟରେ ଛିଡା ହୋଇଥିବା ଏକ ସିମେଣ୍ଟ ବୋଝେଇ ଟ୍ରକର ସମ୍ମୁଖ ପଟରୁ ଏକ ପିକ୍‌‌ଅପ୍‌‌ ଭ୍ୟାନ ଧକ୍କା ଦେବା ଫଳରେ ପିକ୍‌‌ଅପ୍‌‌ ଚାଳକ ମୃତ୍ୟୁବରଣ କରିଥିବା ଜଣାପଡିଛି। ଅପରାହ୍ନ ପ୍ରାୟ ୧.୩୦ମିନିଟ ସମୟରେ ଖାଲି ପ୍ଲାଷ୍ଟିକ ଡ୍ରମ୍‌‌ ବୋଝେଇ କରି ଆଠଗଡ ପଟକୁ ଆସୁଥିବା ପିକ୍‌‌ଅପ୍‌‌ ଭ୍ୟାନଟି ରାସ୍ତା କଡରେ ଛିଡା ହୋଇଥିବା ଟ୍ରକ୍‌‌କୁ ସମ୍ମୁଖରୁ ପିଟି ଥିଲା।
ବଡମ୍ବା ବନମାଳିପୁରର ତ୍ରିଲୋଚନ ସାହୁ (୫୨) ନାମକ ପିକ୍‌‌ଅପ୍‌‌ ଭ୍ୟାନର ଚାଳକକୁ ଗୁରୁତର ଅବସ୍ଥାରେ ଉଦ୍ଧାର କରି ଆଠଗଡ ଉପଖଣ୍ଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ତେବେ ଚିକିତ୍ସାଧିନ ଅବସ୍ଥାରେ ସେ ମୃତ୍ୟୁବରଣ କରିଥିବା ଜଣାପଡିଛି। ପୁଲିସ ଦୁର୍ଘଟଣାଗସ୍ତ ଦୁଇ ଗାଡିକୁ ଜବତ କରିଥିଲା। ଏଥି ସହିତ ଚାଳକର ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଆଠଗଡ ଡାକ୍ତରଖାନାରେ ସଂରକ୍ଷିତ ରଖିଥିବା ବେଳେ ଏକ ଦୁର୍ଘଟଣାଜନିତ ମାମଲା ରୁଜୁ କରି ଘଟଣାର ତଦନ୍ତ କରୁଥିବା ଜଣାପଡିଛି।