ଆଠଗଡ: ଗୋପବନ୍ଧୁ ବିଜ୍ଞାନ ମହାବିଦ୍ୟାଳୟରେ ଇଂରାଜୀ ଓ ଇତିହାସ ବିଭାଗର ମିଳିତ ଆୟୋଜନରେ ଏକ ଆନ୍ତଃବିଭାଗୀୟ ପାଠଚକ୍ର ମଙ୍ଗଳବାର ଅନୁଷ୍ଠିତ ହୋଇଯାଇଛି। କଲେଜର ଅଧ୍ୟକ୍ଷ ଲୋକନାଥ ସାହୁଙ୍କ ପୌରୋହିତ୍ୟରେ ଅନୁଷ୍ଠିତ ଏହି ପାଠଚକ୍ରରେ ଇଂରାଜୀ ବିଷୟ ବିଶେଷଜ୍ଞ ବକ୍ତା ଭାବେ ରେଭେନ୍ସା ବିଶ୍ୱ ବିଦ୍ୟାଳୟର ସହଯୋଗୀ ପ୍ରଫେସର ଡଃ ଖଗେନ୍ଦ୍ର ସେଠୀ ଯୋଗଦେଇ ଉତ୍ତର ଉପନିବେଷବାଦ ଓ ଭାରତୀୟ ଇଂରାଜୀ ସାହିତ୍ୟ ଉପରେ ଏହାର ପ୍ରଭାବ ସଂପର୍କରେ ବିସ୍ତୃତ ଆଲୋଚନା କରିଥିଲେ। ପରବର୍ତ୍ତୀ ପର୍ଯ୍ୟାୟରେ ନୂଆଦିଲ୍ଲୀସ୍ଥିତ ଇତିହାସ ଗବେଷଣା ସଂସ୍ଥାର ବରିଷ୍ଠ ଗବେଷକ ତଥା ରେଭେନ୍ସା ବିଶ୍ୱବିଦ୍ୟାଳୟର ପ୍ରାକ୍ତନ ପ୍ରଫେସର ଡଃ ହରିହର ପଣ୍ଡା ଉପନିବେଷବାଦୀ ବିରୋଧି ସଂଗ୍ରାମରେ ଓଡିଶାର ବୀର ସ୍ୱାଧୀନତା ସଂଗ୍ରାମୀଙ୍କ ଭୂମିକା ପ୍ରସଙ୍ଗରେ ବିସ୍ତୃତ ଆଲୋକପାତ କରିଥିଲେ।
ଇଂରାଜୀ ବିଭାଗୀୟ ମୁଖ୍ୟ ଦେବାଶିଷ ପଟ୍ଟନାୟକ ଅତିଥି ପରିଚୟ ପ୍ରଦାନ କରିଥିବାବେଳେ ଇତିହାସ ବିଭାଗୀୟ ମୁଖ୍ୟ ପ୍ରାଧ୍ୟାପିକା ଦମୟନ୍ତୀ ପରିଡା ଭିତ୍ତି ପ୍ରବନ୍ଧ ପାଠ କରିଥିଲେ ଏବଂ ଅଧ୍ୟାପିକା ସସ୍ମିତା ଖାଲକୋ ପାଠଚକ୍ର ସଂଯୋଜନା କରିଥିଲେ। ଆଲୋଚ୍ୟ ପ୍ରସଙ୍ଗ ଉପରେ ପ୍ରାଧ୍ୟାପକ ପ୍ରତାପ କେଶରୀ ଖାଟୋଇ, ଦେବେଶ ନନ୍ଦନ ରଥ ପ୍ରମୁଖ ନିଜର ଅଭିମତ ରଖିଥିଲେ। ଅଧ୍ୟାପିକା ଦେବଶ୍ରୀତା ମିଶ୍ର, ଛାୟା ମହାପାତ୍ର, ଡଃ ଗାୟତ୍ରୀ ତ୍ରିପାଠୀ, ଅଧ୍ୟାପକ ପ୍ରଣବ କୁମାର ଦାସ, ସୌମ୍ୟକାନ୍ତ ସେନାପତି ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିବାବେଳେ ପାଠଚକ୍ର ସଂଯୋଜକ ଡଃ ଗୌତମବୁଦ୍ଧ ସୀତାରାମ ଧନ୍ୟବାଦ ଅର୍ପଣ କରିଥିଲେ।
