ସମାଜ ଡିଜିଟାଲ ଡେସ୍କ: ଏବେ କୌଣସି ଘରୋଇ ହସ୍ପିଟାଲ ହେଉ କି ନର୍ସିଂ ହୋମ୍ ରୋଗୀଙ୍କ ମୃତଦେହକୁ ଅଟକାଇ ପାରିବେ ନାହିଁ । ମୃତ୍ୟୁ ହେବାର ୨ଘଣ୍ଟା ମଧ୍ୟରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରିବା ବାଧ୍ୟତାମୂଳକ । ଚିକିତ୍ସା ପାଇଁ ଦେୟ ବାକି ଥିଲେ ବି ମୃତଦେହକୁ ଛାଡିବାକୁ ବାଧ୍ୟ ହେବେ ସବୁ ହସ୍ପିଟାଲର କର୍ତ୍ତୃପକ୍ଷ । ଏଭଳି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି ଆସାମ ସରକାର । ଆଜି ଆସାମ କ୍ୟାବିନେଟରେ ଏନେଇ ଆସିଥିବା ପ୍ରସ୍ତାବକୁ ମଞ୍ଜୁରୀ ପ୍ରଦାନ କରିଛନ୍ତି । ସରକାର ଘୋଷଣା କରିଛନ୍ତି ଯେ ବିଲ୍ ବାକି ଥିଲେ ବି କୌଣସି ଘରୋଇ ମେଡିକାଲ ରୋଗୀଙ୍କ ମୃତ୍ୟୁ ହେବା ପରେ ଦୁଇ ଘଣ୍ଟାରୁ ଅଧିକ ସମୟ ମୃତଦେହକୁ ଅଟକାଇ ରଖିପାରିବେ ନାହିଁ ।
ସରକାର କହିଛନ୍ତି ମୃତ ଦେହକୁ ଅଟକାଇ ପରିବାର ଉପରେ ଚାପ ପକାଇବା ଅମାନବୀୟ । ଏଭଳି କରିବାକୁ ଅନୁମତି ଦିଆଯିବ ନାହିଁ । ଯଦି କୌଣସି ହସ୍ପିଟାଲ ନିର୍ଦ୍ଧାରିତ ସମୟଠାରୁ ଅଧିକ ସମୟ ପାଇଁ ମୃତଦେହକୁ ରଖିବାର ସୂଚନା ମିଳେ ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ୨୪ଘଣ୍ଟା ଟୋଲ-ଫ୍ରି ହେଲ୍ପଲାଇନ୍ ନମ୍ବର ଆରମ୍ଭ କରିବେ । ଏଥିରେ ଅଭିଯୋଗ ଆସିଲେ ସଂପୃକ୍ତ ହସ୍ପିଟାଲର ଲାଇସେନ୍ସ ୪ରୁ ୬ମାସ ନିଲମ୍ବନ କରିବା ସହ ୫ଲକ୍ଷ ଟଙ୍କା ଜରିମାନା ହୋଇପାରେ । ଏହାସତ୍ୱେ ପୁଣି ଥରେ ସମାନ ଭୁଲ କରିଲେ ହସ୍ପିଟାଲର ପଞ୍ଜିକରଣକୁ ସ୍ଥାୟୀ ଭାବରେ ବାତିଲ କରାଯିବ ।
The #AssamCabinet has decided that no nursing home or hospital in the state can hold a dead body “hostage” over unpaid bills. pic.twitter.com/mQYjKxpAMM
— Himanta Biswa Sarma (@himantabiswa) July 10, 2025
