ଗୁଆହାଟୀ : ଆସାମର ଗୋଲାଘାଟ ଓ ଜୋରହାଟ ଜିଲାରେ ଘଟିଥିବା ମଦ ମୃତ୍ୟୁସଂଖ୍ୟା ରବିବାର ସୁଦ୍ଧା ୧୪୩କୁ ବୃଦ୍ଧି ପାଇଛି। ଏହି ଘଟଣାରେ ୩୩୧ଜଣ ଅସୁସ୍ଥ ହୋଇ ବିଭିନ୍ନ ହସ୍ପିଟାଲରେ ଚିକିତ୍ସିତ ହେଉଥିବା ସରକାରୀ ଅଧିକାରୀ କହିଛନ୍ତି। ସ୍ବାସ୍ଥ୍ୟ ବିଭାଗର ବରିଷ୍ଠ ଅଧିକାରୀଙ୍କ କହିବା ଅନୁଯାୟୀ ଜୋରହାଟ ମେଡିକାଲ କଲେଜ ଓ ହସ୍ପିଟାଲରେ ୭୧ଜଣଙ୍କର ମୃତ୍ୟୁ ହୋଇଥିବାବେଳେ ଏଠାରେ ଆଉ ୨୭୨ଜଣ ଚିକିତ୍ସିତ ହେଉଛନ୍ତି। ଗୋଲାଘାଟଜିଲାରେ ୪୯ଜଣଙ୍କର ମୃତ୍ୟୁ ହୋଇଥିବାବେଳେ ୫୯ଜଣ ଗୋଲାଘାଟ ସିଭିଲ ହସ୍ପିଟାଲରେ ଚିକିତ୍ସିତ ହେଉଛନ୍ତି। ଆଉ କେତେକ ଲୋକ ନିଜ ଘରେ ପ୍ରାଣ ହରାଇଛନ୍ତି। ମୃତକମାନେ ଚା ବଗିଚାର ଶ୍ରମିକ। ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ ଓ ସ୍ବାସ୍ଥ୍ୟମନ୍ତ୍ରୀ ହିମନ୍ତ ଶର୍ମା ଶନିବାର ପରିସ୍ଥିତିକୁ ସମୀକ୍ଷା କରିଥିଲେ। ରାଜ୍ୟ ସରକାର ମୃତବ୍ୟକ୍ତିଙ୍କ ପରିବାର ପାଇଁ ୨ଲକ୍ଷ ଟଙ୍କା ଓ ଅସୁସ୍ଥଙ୍କ ପାଇଁ ୫୦ହଜାର ଟଙ୍କା କ୍ଷତିପୂରଣ ଘୋଷଣା କରିଛନ୍ତି। ଏହି ଘଟଣାରେ ୧୨ଜଣଙ୍କୁ ଗିରଫ କରାଯାଇଥିବାବେଳେ ୨ଜଣ ଅଧିକାରୀଙ୍କୁ ନିଲମ୍ବନ କରାଯାଇଛି।
