ସମାଜ ଡିଜିଟାଲ ଡେସ୍କ: ଦୁନିଆର ୧ ନମ୍ବର ମୋବାଇଲ୍ କମ୍ପାନୀ ହେବାର ମୁକୁଟ ହରାଇଲା ଲୋକପ୍ରିୟ ଟେକ୍ କମ୍ପାନୀ ଆପଲ୍। ୨୦୨୪ର ପ୍ରଥମ ତ୍ରୈମାସରେ ଆପଲ୍ର ସ୍ମାର୍ଟଫୋନ୍ ଯୋଗାଣ ୧୦ ପ୍ରତିଶତ ହ୍ରାସ ପାଇଛି। ରିସର୍ଚ୍ଚ ଫାର୍ମ ଆଇଡିସିର ରିପୋର୍ଟରେ ଏହି ସୂଚନା ଦିଆଯାଇଛି।
ସମ୍ବାଦ ସରବରାହ ସଂସ୍ଥା ରଏଟର୍ସ ଆଇଡିସି ରିପୋର୍ଟକୁ ଦର୍ଶାଇ କହିଛି ଯେ, ଜାନୁୟାରୀରୁ ମାର୍ଚ୍ଚ ମଧ୍ୟରେ ବୈଶ୍ଵିକ ସ୍ତରରେ ମୋବାଇଲ୍ ଯୋଗାଣ ୭.୮ ପ୍ରତିଶତ ବୃଦ୍ଧି ପାଇ ୨୮.୯ କୋଟିରେ ପହଞ୍ଚିଛି। ତେବେ କୋରିଆ କମ୍ପାନୀ ସାମସଙ୍ଗର ଭାଗିଦାରୀ ଏଥିରେ ୨୦.୮ ପ୍ରତିଶତ ରହିଛି, ଯାହାକି ଆପଲ୍ଠାରୁ ଅଧିକ।
ହ୍ରାସ ପାଇଛି ଆଇଫୋନ୍ ବିକ୍ରି:
ଡିସେମ୍ବର ତ୍ରୈମାସରେ ଜୋରଦାର ପ୍ରଦର୍ଶନ ପରେ ଆପଲର ଆଇଫୋନ୍ ବିକ୍ରିରେ ହ୍ରାସ ପରିଲକ୍ଷିତ ହୋଇଛି। ଅକ୍ଟୋବର-ଡିସେମ୍ବର ତ୍ରୈମାସରେ ସାମସଙ୍ଗକୁ ପଛରେ ପକାଇ ଆପଲ୍ ବିଶ୍ୱର ଏକ ନମ୍ବର ମୋବାଇଲ୍ କମ୍ପାନୀ ସାଜିଥିଲା। କିନ୍ତୁ ଗତ ତ୍ରୈମାସରେ କମ୍ପାନୀ ୧୭.୩ ପ୍ରତିଶତ ବଜାର ଭାଗିଦାରୀ ସହ ଦ୍ୱିତୀୟ ସ୍ଥାନକୁ ଖସି ଆସିଛି।
ସ୍ଵାମୀଙ୍କ ସହ ପଦ୍ମ ଧରିଲେ ପୂର୍ବତନ ମହିଳା କମିଶନ ଅଧ୍ୟକ୍ଷା ଜ୍ୟୋତି ପାଣିଗ୍ରାହୀ
ତୃତୀୟ ସ୍ଥାନରେ ଚାଇନା କମ୍ପାନୀ:
ଚାଇନା ମୋବାଇଲ ବ୍ରାଣ୍ଡ୍ ସାଓମି ୨୦୨୪ର ପ୍ରଥମ ତ୍ରୈମାସରେ ୧୪.୧ ପ୍ରତିଶତ ଭାଗିଦାରୀ ସହିତ ତୃତୀୟ ସ୍ଥାନରେ ରହିଛି।
ସାମସଙ୍ଗର ମାର୍କେଟ ଶେୟାର କାହିଁକି ବୃଦ୍ଧି ପାଇଲା?
ବର୍ଷ ଆରମ୍ଭରେ ସାମସଙ୍ଗ ଏହାର ନବୀନତମ ଫ୍ଲାଗସିପ୍ ସ୍ମାର୍ଟଫୋନ୍ ଲାଇନ୍ଅପ୍ – ଗାଲାକ୍ସି ଏସ ୨୪ ସିରିଜ୍ ଲଞ୍ଚ୍ କରିଥିଲା। ଏହି ସମୟ ମଧ୍ୟରେ ୬୦ ମିଲିୟନରୁ ଅଧିକ ଫୋନ୍ ଯୋଗାଣ ହୋଇଛି। ନିକଟ ତ୍ରୈମାସରେ ଆପଲ୍ ୫୦.୧ ମିଲିୟନ ଆଇଫୋନ୍ ଯୋଗାଇଛି, ଯାହା ଗତ ବର୍ଷ ସମାନ ଅବଧିରେ ୫୫.୪ ମିଲିୟନ ରହିଥିଲା। ଏଠାରେ ସୂଚନାଯୋଗ୍ୟ, ଚୀନ୍ କମ୍ପାନୀ ଏବଂ ସରକାରୀ ଏଜେନ୍ସିମାନେ ଆପଲ୍ ମୋବାଇଲ୍ ବ୍ୟବହାରକୁ ସୀମିତ କରିବାକୁ ନିଷ୍ପତ୍ତି ନେବା ପରେ ଆପଲ୍ ମୋବାଇଲ୍ ଯୋଗାଣ ହ୍ରାସ ଘଟିଛି।
