ଡେସ୍କ: ଇମ୍ରାନ ଖାନଙ୍କ ଉପରେ ଆଉ ଏକ ହତ୍ୟା ଉଦ୍ୟମ ହେବାର ସମ୍ଭାବନା ଅଛି ବୋଲି ଇସଲାମାବାଦ ହାଇକୋର୍ଟର ପ୍ରଧାନ ବିଚାରପତି ଶୁକ୍ରବାର ଦିନ କହିଛନ୍ତି ଏବଂ ପୂର୍ବତନ ପ୍ରଧାନମନ୍ତ୍ରୀଙ୍କ ଉପରେ ହେଉଥିବା ବିପଦକୁ ଜାଣିବା ସରକାରଙ୍କ ଦାୟିତ୍ୱ। ଇମ୍ରାନଙ୍କ ପାକିସ୍ତାନ ତେହେରିକ-ଇ-ଇନସାଫ (ପିଟିଆଇ) ପାର୍ଟି ଦ୍ୱାରା ହୋଇଥିବା ପ୍ରଦର୍ଶନ ଯୋଗୁଁ ରାସ୍ତା ବନ୍ଦ ସମ୍ପର୍କରେ ବ୍ୟବସାୟୀଙ୍କ ପକ୍ଷରୁ କରାଯାଇଥିବା ଆବେଦନର ଶୁଣାଣି ବେଳେ ପ୍ରଧାନ ବିଚାରପତି ଆମିର ଫାରୁକ ଏହା କହିଛନ୍ତି।
କୋର୍ଟରେ ଦାଖଲ ହୋଇଥିବା ଗୁପ୍ତଚର ରିପୋର୍ଟକୁ ଦର୍ଶାଇ ବିଚାରପତି କହିଛନ୍ତି ଯେ ଇମ୍ରାନଙ୍କ ଉପରେ ଆଉ ଏକ ମରଣାନ୍ତକ ଆକ୍ରମଣ ହେବାର ସମ୍ଭାବନା ରହିଛି। ଏହି ପ୍ରସଙ୍ଗରେ ସରକାର ଦୃଷ୍ଟି ଦେବା ଉଚିତ ବୋଲି ସେ କହିଛନ୍ତି। ଜଷ୍ଟିସ ଫାରୁକ୍ କହିଛନ୍ତି ଯେ ପିଟିଆଇ ଏହାର ଦୀର୍ଘ ପଦଯାତ୍ରା ପାଇଁ ଇସଲାମାବାଦ ପ୍ରଶାସନ ନିକଟରେ ଏକ ନୂତନ ଆବେଦନ ଦାଖଲ କରିବା ଉଚିତ। ସେ କହିଛନ୍ତି ଯେ ଯଦି ଏହି ସମସ୍ୟାର ସମାଧାନ ନହୁଏ ତେବେ କୋର୍ଟରେ ଏକ ନୂତନ ଆବେଦନ ମଧ୍ୟ କରାଯାଇପାରିବ।
ପାକିସ୍ତାନର ସୁପ୍ରିମକୋର୍ଟ ଇମ୍ରାନଙ୍କ ବିରୋଧ ପ୍ରଦର୍ଶନକୁ ବନ୍ଦ କରିବା ପାଇଁ ହୋଇଥିବା ଏକ ଆବେଦନକୁ ଖାରଜ କରିଦେଇଛନ୍ତି। କୋର୍ଟ କହିଛନ୍ତି, ଏହା ଏକ ରାଜନୈତିକ ପ୍ରସଙ୍ଗ ଏବଂ ଏହାକୁ ସେହି ସ୍ତରରେ ସମାଧାନ କରାଯିବା ଉଚିତ। ଏହି ପ୍ରଦର୍ଶନ ନଭେମ୍ବର ଶେଷ ସପ୍ତାହରେ ଇସଲାମାବାଦରେ ପହଞ୍ଚିବ ବୋଲି ଆଶା କରାଯାଉଛି। ଅନ୍ୟପକ୍ଷରେ ରାୱଲପିଣ୍ଡିରେ ଚାଲିଥିବା ଏହି ପଦଯାତ୍ରାରେ ଯୋଗଦେବେ ବୋଲି ଇମ୍ରାନ ଖାନ ଘୋଷଣା କରିଛନ୍ତି।
