ହଷ୍ଟେଲରେ ଛାତ୍ରୀମାନେ ଖାଇବାକୁ ନପାଇ କାନ୍ଦି କାନ୍ଦି ବ୍ଲକ କାର୍ଯ୍ୟାଳୟ ଯିବା ଘଟଣା; ଠାକୁରମୁଣ୍ଡାରେ ଗଣ ଆନ୍ଦୋଳନ

ଠାକୁରମୁଣ୍ଡା: ହଷ୍ଟେଲରେ ଛାତ୍ରୀମାନେ ଖାଇବାକୁ ନପାଇ କାନ୍ଦି କାନ୍ଦି ବ୍ଲକ କାର୍ଯ୍ୟାଳୟ ଯିବା ଘଟଣାରେ ମାନବାଧିକାର କମିଶନଙ୍କ ରିପୋର୍ଟ ପରେ ଏବେ ଆଦିବାସୀ ମେଳି ଆରମ୍ଭ ହୋଇଛି। ଏହାକୁ ନେଇ ଶୁକ୍ରବାର ଠାକୁରମୁଣ୍ଡା ସଚେତନ ନାଗରିକ ମଞ୍ଚ ପକ୍ଷରୁ ଜନ ଆନ୍ଦୋଳନ କରାଯାଇଛି। ଏପରି ଘଟଣା ସାମ୍ନାକୁ ଆସିଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକରୁ। ଗତ ୨୩/୧୦/୨୨ରେ ସ୍କୁଲ ହଷ୍ଟେଲରେ ଖାଇବାକୁ ନପାଇ ୯୪ଜଣ ଛାତ୍ରୀ ଠାକୁରମୁଣ୍ଡା ବ୍ଲକ କାର୍ଯ୍ୟାଳୟକୁ ଅଭିଯୋଗ ଶୁଣାଇବା ପାଇଁ ପହଞ୍ଚିଥିଲେ । ହେଲେ ସେଦିନ ବ୍ଲକ କାର୍ଯ୍ୟାଳୟ ଛୁଟି ଥିବାରୁ କାହାରିକୁ ନପାଇ କାର୍ଯ୍ୟାଳୟ ସମ୍ମୁଖରେ କାନ୍ଦିଥିଲେ। ଏହି ଘଟଣା ବିଭିନ୍ନ ଗଣମାଧ୍ୟମରେ ପ୍ରସାର ପ୍ରଚାର ହେଲା ପରେ ମାନବାଧିକାର କର୍ମୀ ରାଧାକାନ୍ତ ତ୍ରିପାଠୀଙ୍କ ଆବେଦନକ୍ରମେ ଏକ ମାମଲା ୩୯୭୧ ମୋତେ ରୁଜୁ ହୋଇ ମୟୁରଭଞ୍ଜ ଜିଲ୍ଲା ପ୍ରଶାସନଙ୍କୁ ରିପୋର୍ଟ ତଲବ କରାଯାଇଛି। ସେହିପରି ୪ସପ୍ତାହ ମଧ୍ୟରେ ରିପୋର୍ଟ ପ୍ରଦାନ କରିବା ପାଇଁ କୁହାଯାଇଛି ।

ହେଲେ ଏତେ ସବୁ ଘଟଣା ପରେ ମଧ୍ୟ ସ୍ଥାନୀୟ ପ୍ରଶାସନ କିମ୍ବା ଜିଲ୍ଲା ପ୍ରଶାସନ ଏହି ଘଟଣାରେ କାହାରି ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନ କରିବା ଅଭିଭାବକ ଏବଂ ସ୍ଥାନୀୟ ଆଦିବାସୀ ଭାଇ ଭଉଣୀମାନଙ୍କୁ ଶକ୍ତ ଆଘାତ ଦେଇଛି। ଘଟଣାକୁ ଏକମାସ ହେବାକୁ ଯାଉଥିବା ବେଳେ ଏପରି ଅବହେଳା କରିଥିବା ଅଧିକାରୀ ଏବଂ ସ୍ଥାନୀୟ ପ୍ରଶାସନର ଅସହଯୋଗ ଯୋଗୁଁ ଦଳିତ ଆଦିବାସୀମାନେ ଆଜି ନିଷ୍ପେସିତ । ଯାହାକୁ ନେଇ ଶୁକ୍ରବାର ଠାକୁରମୁଣ୍ଡା ସଚେତନ ନାଗରିକ ମଞ୍ଚ ପକ୍ଷରୁ ଜନ ଆନ୍ଦୋଳନ କରାଯାଇଛି। ସୁଶ୍ରୀ ଜବାମଣୀ ଟୁଡୁଙ୍କ ନେତୃତ୍ୱରେ ଗଣେଶ ଗାଗରାଈ, ବାବୁଲି ଲୁଗୁନ୍, ବିମଳ କୁମାର ସେନାପତି, ଗତିକୃଷ୍ଣ ପଣ୍ଡା, ସତ୍ୟନନ୍ଦ ପଲେଇ, ଜଗଦୀଶ ମୁର୍ମୁ ପ୍ରମୁଖ ଯୋଗଦେଇ ଅଭିଭାଷଣ ରଖିଥିଲେ। ଠାକୁରମୁଣ୍ଡା ଅଞ୍ଚଳର ଶହ ଶହ ଲୋକ ଆଜି ଠାକୁରମୁଣ୍ଡା ମା’ବାସୁଳୀ ମନ୍ଦିରରୁ ଏକ ବିରାଟ ପଟୁଆରେ ଆସି ବ୍ଲକ କାର୍ଯ୍ୟାଳୟ ପହଞ୍ଚି ଗୋଷ୍ଠୀ ଉନ୍ନୟନ ଅଧିକାରୀଙ୍କ ଜରିଆରେ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ୫ ଦଫା ସମ୍ବଳିତ ଦାବି ପତ୍ର ପ୍ରଦାନ କରାଯାଇଛି। ତେବେ ବିଡିଓ ଅନୁପସ୍ଥିତ ଯୋଗୁଁ ବ୍ଲକର ବରିଷ୍ଠ କିରାଣୀ ଓ ଜିପିଓଙ୍କୁ ଦାବି ପତ୍ର ଦେଇଥିଲେ। ଠାକୁରମୁଣ୍ଡା ଏକ ଆଦିବାସୀ ଅଧ୍ୟୁଷିତ ବ୍ଲକ ହୋଇଥିବାରୁ ସ୍କୁଲ କଲେଜମାନଙ୍କରେ ପଢ଼ୁଥିବା ଛାତ୍ରଛାତ୍ରୀଙ୍କୁ ଅଣଦେଖା କରାଯାଉଛି। ଯାହା ଫଳରେ ବିଭିନ୍ନ ସ୍କୁଲ କଲେଜମାନଙ୍କରୁ ପ୍ରତ୍ୟେକ ଦିନ ଏପରି ଘଟଣା ସାମ୍ନାକୁ ଆସୁଛି । ଯଦି ଆଗାମୀ ଦିନରେ ଏପରି କାର୍ଯ୍ୟ ସାମ୍ନାକୁ ଆସେ, ତେବେ ଏହି ଜନ ଆନ୍ଦୋଳନକୁ ଆହୁରି ତୀବ୍ରତର କରାଯିବ । ସେହିପରି ଏପରି କାର୍ଯ୍ୟ କରିଥିବା ସ୍ଥାନୀୟ ପ୍ରଶାସନ ଏବଂ ସ୍କୁଲ କର୍ତ୍ତୃପକ୍ଷଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବୀ କରିଛନ୍ତି।

Comments are closed.