ହେଡିଂଲି: ଏଣିକି ଭାରତ ଓ ଇଂଲଣ୍ଡ କ୍ରିକେଟ୍ ଦଳ ମଧ୍ୟରେ ଦ୍ବିପାକ୍ଷିକ ଟେଷ୍ଟ ଶୃଙ୍ଖଳାର ବିଜେତାଙ୍କୁ ଆଣ୍ଡରସନ୍-ତେନ୍ଦୁଲକର ଟ୍ରଫି ପ୍ରଦାନ କରାଯିବ। ଶୁକ୍ରବାରଠାରୁ ଇଂଲଣ୍ଡରେ ଉଭୟ ଦେଶଙ୍କ ମଧ୍ୟରେ ହେବାକୁ ଥିବା ଟେଷ୍ଟ ଶୃଙ୍ଖଳା ଆଣ୍ଡରସନ୍-ତେନ୍ଦୁଲକର ଟ୍ରଫି ନାମରେ ଖେଳାଯିବ। ସୂଚନାଯୋଗ୍ୟ; ଇଂଲଣ୍ଡରେ ଭାରତ ବିପକ୍ଷ ଟେଷ୍ଟ ଶୃଙ୍ଖଳା ବିଜେତାକୁ ପଟୌଦି ଟ୍ରଫି ଏବଂ ଭାରତରେ ଇଂଲଣ୍ଡର ଟେଷ୍ଟ ଶୃଙ୍ଖଳାର ବିଜେତାଙ୍କୁ ଆଣ୍ଟୋନି ଡି ମେଲେ ଟ୍ରଫି ପ୍ରଦାନ କରା ଯାଉଥିଲା। ହେଲେ ଉଭୟ ଟ୍ରଫିର ସ୍ଥାନ ନେଇଛି ଆଣ୍ଡରସନ୍-ତେନ୍ଦୁଲକର ଟ୍ରଫି।
ଉକ୍ତ ଟ୍ରଫିର ଉନ୍ମୋଚନ ଗୁରୁବାର ହେଡିଂଲି ଷ୍ଟାଡିୟମ୍ରେ କରା ଯାଇଥିଲା। ଉଭୟ ଜେମ୍ସ ଆଣ୍ଡରସନ୍ ଓ ସଚିନ ତେନ୍ଦୁଲକର ସେମାନଙ୍କ ନାମରେ ନାମିତ ଟ୍ରଫିକୁ ଉନ୍ମୋଚନ କରିଥିଲେ। ବିସିସିଆଇ ଓ ଇଂଲଣ୍ଡ ଏଣ୍ଡ୍ ୱେଲ୍ସ କ୍ରିକେଟ୍ ବୋର୍ଡ (ଇସିବି) ମିଳିତ ଭାବେ ଭାରତ-ଇଂଲଣ୍ଡ ଟେଷ୍ଟ ଶୃଙ୍ଖଳାକୁ ଆଣ୍ଡରସନ୍-ତେନ୍ଦୁଲକର ଟ୍ରଫି ନାମରେ ନାମିତ କରିବାକୁ ନିଷ୍ପତ୍ତି ନେଇଥିଲେ। ଏହି ଟ୍ରଫିରେ ସଚିନଙ୍କ କଭର୍ ଡ୍ରାଇଭ୍ ଓ ଆଣ୍ଡରସନ୍ଙ୍କ ବୋଲିଂ ଆକ୍ସନ୍ର ଫଟୋ ସହ ଉଭୟ ମହାନ୍ କ୍ରିକେଟରଙ୍କ ଦସ୍ତଖତ ରହିଛି। ତେବେ ଭାରତ-ଇଂଲଣ୍ଡ ଟେଷ୍ଟ ଶୃଙ୍ଖଳାରୁ ପଟୌଦି ପରିବାରର ନାମକୁ ବାଦ୍ ଦିଆଯିବ ନାହିଁ। ଏଣିକି ଉଭୟ ଦେଶ ମଧ୍ୟରେ ଟେଷ୍ଟ ଶୃଙ୍ଖଳା ବିଜୟୀ ଦଳର ଅଧିନାୟକଙ୍କୁ ପଟୌଦି ପଦକ ପ୍ରଦାନ କରାଯିବ। ସେମାନଙ୍କ ନାମରେ ଟେଷ୍ଟ ଶୃଙ୍ଖଳାର ଟ୍ରଫି ନାମିତ ହେବା ଗର୍ବର ବିଷୟ ବୋଲି ଆଣ୍ଡରସନ୍ ଓ ତେନ୍ଦୁଲକର କହିଥିଲେ। ଇଂଲଣ୍ଡର ପୂର୍ବତନ ଫାଷ୍ଟବୋଲର ଜେମ୍ସ ଆଣ୍ଡରସନ୍ କ୍ରିକେଟ୍ ଇତିହାସରେ ସଫଳତମ ପେସ୍ ବୋଲର। ସେ ୧୮୮ ଟେଷ୍ଟରୁ ୭୦୪ଟି ୱିକେଟ୍ ନେଇଛନ୍ତି। ଭାରତ ବିପକ୍ଷରେ ସେ ୩୯ଟି ଟେଷ୍ଟରୁ ୧୪୯ଟି ୱିକେଟ୍ ନେଇଛନ୍ତି। ଟେଷ୍ଟ କ୍ରିକେଟ୍ରେ ବିଶ୍ବର ସଫଳତମ ବ୍ୟାଟ୍ସମ୍ୟାନ୍ ସଚିନ ତେନ୍ଦୁଲକର ବିଶ୍ବ କୀର୍ତ୍ତିମାନ ୨୦୦ ଟେଷ୍ଟରୁ ୫୧ଟି ଶତକ ସହ ସର୍ବାଧିକ ୧୫୯୨୧ ରନ୍ କରିଛନ୍ତି। ଇଂଲଣ୍ଡ ବିପକ୍ଷରେ ସଚିନ ୩୨ ଟେଷ୍ଟରୁ ୨୫୩୫ ରନ୍ କରିଛନ୍ତି।
