ପୁରୀ : ଦୁଇ ଦିନିଆ ଓଡିଶା ଗସ୍ତର ଆସିଥିବା ଆମିକସ୍ କ୍ୟୁରି ରଞ୍ଜିତ କୁମାର ଶନିବାର ଶ୍ରୀମନ୍ଦିର ଯାଇ ଶ୍ରୀଜୀଉଙ୍କ ଦର୍ଶନ କରିଛନ୍ତି । ମହାପ୍ରଭୁଙ୍କ ସମେତ ଅନ୍ୟ ପାର୍ଶ୍ବ ଦେବାଦେବୀଙ୍କ ଦର୍ଶନ କରିଛନ୍ତି । ଏହି ସମୟରେ ସେ ଶ୍ରୀମନ୍ଦିରରେ ଭକ୍ତଙ୍କ ସୁରକ୍ଷା, ଶାନ୍ତିଶୃଙ୍ଖଳା ଓ ପରିମଳ ବ୍ୟବସ୍ଥା ଆଦିକୁ ତନତନ ଯାଞ୍ଚ କରିବା ପରେ ମନ୍ଦିର ପରିସରରେ ଥିବା ପାନୀୟ ଜଳ କେନ୍ଦ୍ରରୁ ପାଣି ପିଇଥିଲେ । ପରେ ସିଂହଦ୍ବାର ଦେଇ ପ୍ରତ୍ୟାବର୍ତ୍ତନ କରିଥିଲେ ।
ଶ୍ରୀମନ୍ଦିର ସଂସ୍କାର ପ୍ରସଙ୍ଗକୁ ନେଇ ଆମିକସ୍ କ୍ୟୁରି ରଞ୍ଜିତ କୁମାରଙ୍କ ଅଧ୍ୟକ୍ଷତାରେ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ । ଜିଲ୍ଲା ଜଜ୍, ଜିଲ୍ଲାପାଳ ଓ ପୁରୀ ଏସ୍ପିଙ୍କ ସମେତ ଏହି ବୈଠକରେ ଗଜପତି ମହାରାଜା, ଶ୍ରୀମନ୍ଦିର ପ୍ରଶାସନ ଓ ସେବାୟତ ଉପସ୍ଥିତ ରହିବେ । ଶ୍ରୀମନ୍ଦିର ନୀତିକାନ୍ତି, ସେବାପୂଜା, ଦର୍ଶନ ବ୍ୟବସ୍ଥା, ସେବାୟତଙ୍କ ଆଚାର ବ୍ୟବହାର ସହିତ ଆନନ୍ଦ ବଜାରରେ ମହାପ୍ରସାଦ ବିକ୍ରି ବ୍ୟବସ୍ଥା ଉପରେ ବୈଠକରେ ଆଲୋଚନା କରାଯିବ । ସନ୍ଧ୍ୟାରେ ଛତିଶା ନିଯୋଗ ଓ ଶ୍ରୀମନ୍ଦିର ପରିଚାଳନା କମିଟି ସଦସ୍ୟଙ୍କୁ ଆମିକସ୍ କ୍ୟୁରି ଭେଟିବାର କାର୍ୟ୍ୟକ୍ରମ ରହିଛି ।
