ବଲାଙ୍ଗିର – ଅକ୍ଷୟ ତୃତୀୟା ଅବସରରେ ସ୍ୱାମୀନାଥନ କମିଟିଙ୍କ ରିପୋର୍ଟ ଅନୁସାରେ ଚାଷୀକୁ ଅମଳର ପ୍ରକୃତ ସର୍ବନିମ୍ନ ସହାୟକ ମୂଲ୍ୟ ଦିଆଗଲେ ଚାଷୀ ଖୁସି ହେବ । ଜିଲା କିଷାନ କଂଗ୍ରେସ ବଲାଙ୍ଗିର ପକ୍ଷରୁ ଆୟୋଜିତ ଅକ୍ଷୟ ତୃତୀୟା ଉତ୍ସବରେ ବଲାଙ୍ଗିର ବିଧାୟକ ନରସିଂହ ମିଶ୍ର ସଦର ବ୍ଲକ ସ୍ଥିତ ଚିକଲବାହାଲ ପଞ୍ଚାୟତର ଫଟକରା ଗାଁରେ ଅକ୍ଷିମୁଠି ଅନୁକୁଳ କରି ଏହା କହିଛନ୍ତି ।
କିଷାନ କଂଗ୍ରେସ ସଭାପତି ସାନନ୍ଦ ମିଶ୍ରଙ୍କ ସଂଯୋଜନାରେ ଅନୁଷ୍ଠିତ କାର୍ଯ୍ୟକ୍ରମରେ ବିଧାୟକ ଶ୍ରୀ ମିଶ୍ର, ଜିଲା କଂଗ୍ରେସ କମିଟି ସଭାପତି ଦିଲୀପ ବେହେରା, ରାଜ୍ୟ କିଷାନ କଂଗ୍ରେସ ସଂପାଦକ ସରୋଜ ରଥ ପ୍ରମୁଖ ଜମିରେ ଧାନବୁଣି ଅକ୍ଷି ମୁଠି ଅନୁକୁଳ କରିଥିଲେ । ବ୍ଲକ କଂଗ୍ରେସ ସଭାପତି ରାମ ପ୍ରସାଦ ମିଶ୍ରଙ୍କ ସଭାପତିତ୍ୱରେ ଏହି ଅବସରରେ ଏକ ସଭା କାର୍ଯ୍ୟ ଅନୁଷ୍ଠିତ ହୋଇଥିଲା ।
ସ୍ଥାନୀୟ ସଫଳ ଚାଷୀଙ୍କୁ ଜିଲା କିଷାନ କଂଗ୍ରେସ ପକ୍ଷରୁ ମୁଖ୍ୟଅତିଥି ମାନପତ୍ର ଉପଢୌକନ ଦେଇ ସମ୍ମାନିତ କରିଥିଲେ । ସରକାର ଚାଷୀଙ୍କୁ ପର୍ଯ୍ୟାପ୍ତ ପରିମାଣରେ ବିହନ ଓ ସାର ଯୋଗାଇବେ ନା ନାହିଁ କିଛି ସ୍ପଷ୍ଟ ହୋଇନାହିଁ ବୋଲି ଜିଲା କଂଗ୍ରେସ ସଭାପତି ଶ୍ରୀ ବେହେରା କହିଥିଲେ । କାର୍ଯ୍ୟକ୍ରମରେ ଶ୍ରୀଧର ବାରିକ, ନାରୀନେତ୍ରୀ ନିଳେଦ୍ରି ସେଠ, ଜୁଲୁ ପଟ୍ଟନାୟକ, ଲୋକନାଥ କୁମୁରା, ଭରତ ଭୋଇ, ସୁରେନ୍ଦ୍ର ବିଶ୍ୱାଳ, ଲମ୍ବୋଦର ମହାକୁର, ଲଳିତ ପଟେଲ, ଗୋପାଳ ପାଣ୍ଡିଆ, ଯୁଗେଶ୍ୱର ପୁଟେଲ, ରଘୁମଣି ପ୍ରଧାନ, କୁବେର ସାହୁ, ଡୋଳାମଣି ସେଠ ପ୍ରମୁଖ ଉପସ୍ଥିତ ଥିଲେ । ବ୍ଲକ କିଷାନ କଂଗ୍ରେସ ସଭାପତି ଗଗନ ନାଥ ଧନ୍ୟବାଦ ଦେଇଥିଲେ ।
