ସମାଜ ଡିଜିଟାଲ ଡେସ୍କ: କାନ୍ସ ଫିଲ୍ମ ଫେଷ୍ଟିଭାଲରେ କୁଇନ୍ ଭଳି ଏଣ୍ଟ୍ରି କରିଛନ୍ତି ଐଶ୍ୱର୍ଯ୍ୟା ରାୟ ବଚ୍ଚନ । ଐଶ୍ୱର୍ଯ୍ୟା ରେଡ କାର୍ପେଟରେ ପ୍ରବେଶ କରିବା ପରେ ତାଙ୍କର ପ୍ରଥମ ଲୁକ୍ ହଜାର ହଜାର ପ୍ରଶଂସକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି । ୭୮ତମ କାନ୍ସ ଫିଲ୍ମ ଫେଷ୍ଟିଭାଲ ପାଇଁ ଐଶ୍ୱର୍ଯ୍ୟା ଫ୍ୟାଶନ୍ ଡିଜାଇନର ମନୀଷ ମାଲହୋତ୍ରାଙ୍କ ଦ୍ୱାରା ଡିଜାଇନ୍ କରାଯାଇଥିବା ଏକ ସୁନ୍ଦର ଶାଢି ବାଛିଥିଲେ । ତାଙ୍କର ଏହି ଲୁକ୍ ପ୍ରଶଂସକଙ୍କୁ ବେଶ ପସନ୍ଦ ଆସିବା ସହ ଅନେକ ଉଠିଥିବା ପ୍ରଶ୍ନର ଜବାବ ମଧ୍ୟ ଦେଇଥିଲା । କାନ୍ସ ଫିଲ୍ମ ଫେଷ୍ଟିଭାଲରେ ଐଶ୍ୱର୍ଯ୍ୟା ଏଣ୍ଟ୍ରି କରିବା ମାତ୍ରେ ତାଙ୍କ ମଥାରେ ଥିବା ସିନ୍ଦୁର ସବୁଠାରୁ ଅଧିକ ଆକର୍ଷଣ ଓ ଆଲୋଚନାର ବିଷୟ ହୋଇଥିଲା । ଏହି ଲୁକ୍ ଦେଖି ସମସ୍ତେ କହିଛନ୍ତି ଯେ ଐଶ୍ୱର୍ଯ୍ୟା ରାୟ ବଚ୍ଚନ କିଛି ନକହି ପାକିସ୍ତାନକୁ ଚାପୁଡା ମାରିଛନ୍ତି ଏବଂ ଅନ୍ତର୍ଜାତୀୟ ସ୍ତରରେ ଭାରତର ‘ଅପରେସନ ସିନ୍ଦୂର’ କୁ ଏହିପରି ପ୍ରତିନିଧିତ୍ୱ କରିଛନ୍ତି ।
ଭାରତ ଏବେ ୩୩ଟି ଦେଶକୁ ନିଜର ପ୍ରତିନିଧିମଣ୍ଡଳ ପଠାଉଛି । ସେମାନେ ୨୨ଏପ୍ରିଲରେ ପହଲଗାଓଁ ଆକ୍ରମଣ ପରେ ହୋଇଥିବା ଅପରେସନ ସିନ୍ଦୂର ସମ୍ପର୍କରେ ଆଲୋଚନା କରିବା ସହ ଆତଙ୍କବାଦୀଙ୍କୁ ପାଳୁଥିବା ଦେଶ ପାକିସ୍ତାନର ଅସଲ ମୁଖା ଖୋଲିବେ । ତେବେ ଏହାରି ଭିତରେ ଐଶ୍ୱର୍ଯ୍ୟା ରାୟ ବଚ୍ଚନଙ୍କ ମଥାରେ ସଜ୍ଜିତ ସିନ୍ଦୂର ଏକକାଳୀନ ଦୁଇଟି ବାର୍ତ୍ତା ଦେଇଛି । ପ୍ରଥମତଃ କାନ୍ସରେ ଭାରତର ସଂସ୍କୃତି ଉପସ୍ଥାପନା ଏବଂ ଅପରେସନ ସିନ୍ଦୂରର ଉପସ୍ଥାପନା । ଦ୍ୱିତୀୟରେ ଏହା ଐଶ୍ୱର୍ଯ୍ୟା ଏବଂ ତାଙ୍କ ସ୍ୱାମୀ ଅଭିଷେକ ବଚ୍ଚନଙ୍କ ମଧ୍ୟରେ ଗତ କିଛି ମାସ ଧରି ଚାଲିଥିବା ଛାଡପତ୍ର ଗୁଜବର ଅନ୍ତ ଘଟାଇଛି । ଐଶ୍ୱର୍ଯ୍ୟାଙ୍କ ଏହି ଲୁକ୍ ପ୍ରସିଦ୍ଧ ଫ୍ୟାଶନ୍ ଡିଜାଇନର ମନୀଷ ମାଲହୋତ୍ରାଙ୍କ ଦ୍ୱାରା ଡିଜାଇନ୍ କରାଯାଇଥିଲା । ଅଭିନେତ୍ରୀ ଜଣକ ଶାଡି ପିନ୍ଧିଥିଲେ, ଯାହା ଏକ ହାତବୁଣା ବଡ ବନାରସୀ ହସ୍ତତନ୍ତ ଶାଢି ଅଟେ । ହାତୀଦାନ୍ତ ରଙ୍ଗର ହାତ ତିଆରି ରୂପା ଜରି ଶାଢି ବେଶ ଆକର୍ଷଣୀୟ ଓ ସୁନ୍ଦର ହୋଇଥିଲା । ଐଶ୍ୱର୍ଯ୍ୟାଙ୍କ ଅଳଙ୍କାର ବହୁତ ସୁନ୍ଦର ହୋଇଥିବାରୁ ଏହା ତାଙ୍କୁ ରାଜକୀୟ ଲୁକ୍ ଦେଇଥିଲା । ସେ ଏପରି ଏକ ହାର ପିନ୍ଧିଥିଲେ ଯେଉଁଥିରେ ୫୦୦କ୍ୟାରେଟରୁ ଅଧିକ ମୋଜାମ୍ବିକ ମାଣିକ ଏବଂ ହୀରା ବ୍ୟବହାର ହୋଇଥିଲା । ସବୁକିଛି ୧୮କ୍ୟାରେଟ ସୁନାରେ ସଜ୍ଜିତ ଥିଲା ।
