ପୁଲିସର ନିଷ୍କ୍ରିୟତାର ସୁଯୋଗ ନେଇ ପୁଣି ମାତିଲେ ଚୋର, ୨ଟି ଘରୁ ଟଙ୍କା ଓ ସୁନା ଲୁଟ୍

ଗୋପାଳପୁର : ଗୋପାଳପୁର ଥାନା ଅନ୍ତର୍ଗତ ଆମ୍ବପୁଆ ଗଜାନନ ବିହାରର ୨ ଟା ତାଲା ବନ୍ଦ ଘରକୁ ଦୁର୍ବୃତ୍ତମାନେ ଟାର୍ଗେଟ କରିବା ସହ ଲୁଟ କରିଥିବା ନେଇ ଥାନାରେ ଲିଖିତ ଅଭିଯୋଗ କରାଯାଇଛି। ଆମ୍ବପୁଆ ଗଜାନନ ବିହାରରେ ରହୁଥିବା ୟୋସବନ୍ତ ବେହେରା ଗତ ୧୫ ତାରିଖ କୌଣସି କାମରେ ବାହାରକୁ ଯାଇଥିଲେ । ବୁଧବାର ରାତ୍ର ୭ଟା  ସମୟରେ ଘରେ ପହଞ୍ଚି ଦେଖିବା ବେଳକୁ ସମସ୍ତ ରୁମ ଖୋଲା ମେଲା ହୋଇ ରହିଥିବା ଦେଖିବାକୁ ପାଇଥିଲେ । ଘର ମଧ୍ୟରେ ଥିବା ୨୨ ଗ୍ରାମର ଗୋଟିଏ ସୁନା ଚେନ, ୧୫ ଗ୍ରାମର ଦୁଇଟି ସୁନା ମୁଦି, ୭୫୦ ଗ୍ରାମର ରୂପା ଏବଂ ନଗଦ ୨୫ ହଜାର ଟଙ୍କା ଚୋରି ହୋଇଥିବା ନେଇ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପ୍ରକାରେ ପୁଲିସ କେସ ନମ୍ବର ୬୨/୨୫ ମାମଲା ରୁଜୁ କରି ଗୋପାଳପୁର ପୁଲିସ, ସାଇଟିଫିକ ଟିମ ଓ ସନ୍ଧାନୀ କୁକୁର ପହଞ୍ଚି ତଦନ୍ତ କରୁଥିବା ପୁଲିସ କହିଛି । ସେହିପରି ଗଜାନନ ବିହାରରେ ରହୁଥିବା  ସନ୍ତୋଷ କୁମାର ନାୟକ ସୋମବାର ପରିବାର ସହ କୌଣସି କାମରେ ଭଞ୍ଜନଗର ଯାଇଥିବାରୁ ଘରେ ତାଲା ପକାଇ ଯାଇଥିଲେ। ବୁଧବାର ଦିନ ସକାଳ ୯ ଘଣ୍ଟା ସମୟରେ ଘରେ ପହଞ୍ଚି ଦେଖିବା ବେଳେ ଘର ତାଲା ଭାଙ୍ଗି ଏକ ଭରି ସୁନା ଓ କିଛି ଟଙ୍କା ଦୁର୍ଵୃତ୍ତ ମାନେ ଚୋରି କରିଥିବା ନେଇ ଥାନାରେ ଅଭିଯୋଗ କରିଥିଲେ ।  ଅଭିଯୋଗ ପ୍ରକାରେ ପୁଲିସ କେସ ନମ୍ବର  ୬୧/୨୫ ରେ ଏକ ମାମଲା ରୁଜୁ କରି ତଦନ୍ତ କରୁଛି । ଅନ୍ୟ ପଟେ ଗୋଟିଏ ଦିନରେ ଦିନ‌ବେଳା ଦୁର୍ବୃତ୍ତ ମାନେ ତାଲା ବନ୍ଦ ଘରକୁ ଟାର୍ଗେଟ କରି ଚୋରି କରିଥିବାରୁ ଏହା ପୁଲିସକୁ ଦୁର୍ବୃତ୍ତ ମାନଙ୍କର‌ ଖୋଲାଖୋଲି ଚ୍ୟାଲେଞ୍ଜ କରୁଥିବା ଦେଖିବାକୁ ମିଳିଛି। ଗତ କିଛି ମାସ ଧରି ଗୋପାଳପୁର ଥାନା ଇଲାକାରେ ଚୋରି ବଢୁଥିବା ବେଳେ ପୁଲିସ ପକ୍ଷରୁ ଦୁର୍ବୃତ୍ତମାନଙ୍କୁ କାବୁ କରିବାରେ ସକ୍ଷମ ହେଉନଥିବାରୁ ଦୁର୍ବୃତ୍ତ ମାନେ ଏପରି କାଣ୍ଡ ଭିଆଉ ଥିବା ଆଲୋଚନା ହେଉଛି।