ବଲାଙ୍ଗୀର: ସାମାଜିକ ଗଣମାଧ୍ୟମର ପ୍ରଚାର ପ୍ରସାର ପରେ ଦେଶ ବିଦେଶରେ ସାମାନ୍ୟ ମନେ ହେଉଥିଲେ ବି କିଛି ଖବର ରୋମାଞ୍ଚ ସୃଷ୍ଟି କରେ। ଏଇ ଯେମିତି, କଳାହାଣ୍ଡି ଜିଲା କୋକସରା ବ୍ଲକ ଆମପାଣିରେ ଲାଗିଥିବା ପୋଷ୍ଟରଗୁଡିକ ଭିନ୍ନ ଖୋରାକ ଯୋଗାଇଛି। ସାଧାରଣତଃ ବିଲେଇ ଏହି ଅଞ୍ଚଳର ଘରେ ଘରେ ବୁଲୁଥିବା ଏବଂ ଗୃହପାଳିତ ପ୍ରାଣୀ ଭାବେ ରଖାଯାଉଥିବା ଦେଖିବାକୁ ମିଳେ। ତେବେ ବର୍ତ୍ତମାନ ଏହି ଅଞ୍ଚଳରେ ଏକ ବିଲେଇ ପାଇଁ ବିଜ୍ଞାପନ ମରାଯାଇଛି।
କାନ୍ଥବାଡ଼ରେ ଲାଗିଥିବା ପୋଷ୍ଟର ଅନୁସାରେ, ଆମପାଣି ଅଞ୍ଚଳରେ ପ୍ରସିଦ୍ଧ ଦଶହରା ଯାତ୍ରା ଅନୁଷ୍ଠିତ ହେଉଥିଲା। ଆମପାଣି ବନ ବିଭାଗର ଫରେଷ୍ଟର ନିଜ ଘରେ ମହାରାଷ୍ଟ୍ର ପ୍ରଜାତିର ଏକ ବିଲେଇ ରଖିଥିଲେ। ଦଶହରା ଦିନ ବିଲେଇର ଖୋଜଖବର ମିଳିଲାନି। ଦଶହରା ଯାତ୍ରାର ସୁଯୋଗ ନେଇ କେହି ପାଳିତ ବିଲେଇକୁ ନେଇ ଯାଇଥିବା ଆଶଙ୍କା କରୁଛନ୍ତି। ତେଣୁ ବିଲେଇ ଖୋଜି ଆଣିଲେ ପ୍ରଥମେ ୨ହଜାର ଟଙ୍କା ପୁରସ୍କାର ଘୋଷଣା କରିଥିବା ବେଳେ ଏବେ ବିଲେଇ ଠିକଣା ଦେଲେ ୧୦ହଜାର ଟଙ୍କା ଦେବେ ବୋଲି ପୋଷ୍ଟରରେ ଉଲ୍ଲେଖ ରହିଛି। ଏହି ଖବର କୋକସରା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
