ନୂଆଦିଲ୍ଲୀ : କେନ୍ଦ୍ରୀୟ ସତର୍କତା ଆୟୋଗ (ସିବିସି) ‘ଆଧାର’ ଜରିଆରେ ଦୁର୍ନୀତିଗ୍ରସ୍ତ ସରକାରୀ ଅଧିକାରୀଙ୍କୁ ଧରିବା ପାଇଁ କାର୍ଯ୍ୟ ଆରମ୍ଭ କରିଛି । ଭିଜିଲାନ୍ସ କମିଶନର କେବି ଚୌଧୁରୀ ରିବବାର ସୂଚନା ଦିଆଯାଇଛି ଯେ ବିଭିନ୍ନ ପ୍ରକାର ଆର୍ଥିକ ନେଣଦେଣ ଏବଂ ସଂପତ୍ତି ଡିଲ୍ ପାଇଁ ଆଧାର ବାଧ୍ୟତାମୂଳକ ହୋଇଛି । ଫଳରେ ଏହାଦ୍ୱାରା ଆୟ ବହିର୍ଭୂତ ସମ୍ପତ୍ତିଠୁଳ କରିଥିବା ଦୁର୍ନୀତିଗ୍ରସ୍ତ ଅଧିକାରୀଙ୍କୁ ଧରିହେବ । ଆଧାର ଜରିଆରେ ସେମାନଙ୍କୁ ବେଆଇନ ଆୟକୁ ଆକଳନ କରିହେବ। ଏଥିପାଇଁ ଏକ ସଫ୍ଟୱେୟାର ବିକାଶ କରିବାର ଯୋଜନା ରହିଛି । ପ୍ୟାନ କାର୍ଡ ଓ ବ୍ୟାଙ୍କ ଆକାଉଣ୍ଟ ସହ ଆଧାର ସଂଯୋଗକୁ ବାଧ୍ୟତାମୂଳକ କରାଯାଇଛି । ଆଧାର ଜରିଆରେ ଜଣେ ବ୍ୟକ୍ତିଙ୍କ ଆର୍ଥିକ ନେଣଦେଣ ତାଙ୍କ ରୋଜଗାରଠାରୁ ଅଧିକ କି ନୁହେଁ, ତାହା ଜାଣହେବ। କୌଣସି ଦୁର୍ନୀତି ଓ ଲାଞ୍ଚ ନେବା ଭଳି ମାମଲାର ତଦନ୍ତ ବେଳେ ଆଧାର ଜରିଆରେ ସବୁ ବିଭାଗକୁ ଗୋଟିଏ ଥରରେ ସଂଯୋଗ କରିହେବ । ଆଧାର ବ୍ୟବହାର ଦ୍ୱାରା ଆବଶ୍ୟକ ତଥ୍ୟ ସଂଗ୍ରହ କରିହେବ । ଲୋକଙ୍କ ସ୍ଥାବର ସମ୍ପତ୍ତି ଏବଂ ଅଂଶଧନ ସମ୍ପର୍କିତ କାରବାର ତଥ୍ୟ ଆୟକର ବିଭାଗ, ପଞ୍ଜିକରଣ ବିଭାଗ, ଫାଇନାନ୍ସିଆଲ ଇଣ୍ଟେଲଜେନ୍ସ ୟୁନିଟ (ଏଫଆଇୟୁ) ଏବଂ ଅନ୍ୟ ସରକାରୀ ଏଜେନ୍ସିରେ ଉପଲବ୍ଧ ରହିଛି । ଏବେ ଆଧାର ଦ୍ୱାରା ଏସବୁ ତଥ୍ୟ ମିଳିପାରିବ ।
