ଆଠଗଡ଼ : ଏକ ଅଭାନନୀୟ ଘଟଣାକ୍ରମରେ ବାଇକ୍-କାର ମଧ୍ୟରେ ମୁହାଁମୁହିଁ ଧକ୍କାରେ ଦୁଇଜଣ ଯୁବକ ପ୍ରାଣ ହରାଇଥିବା ଜଣାପଡିଛି। ପୁରୁଣା କଟକ-ସମ୍ବଲପୁର ରାସ୍ତାର ନଡୁଆପଡା ଛକରେ ବାଇକ ସହିତ କାରର ମୁହାଁମୁହିଁ ଧକ୍କା ହେବା ଫଳରେ ବାଇକ୍ ଆରୋହୀ ଦୁଇଜଣ ଗୁରୁତର ଆହତ ହୋଇଥିଲେ । ବୁଧବାର ଅପରାହ୍ନରେ ପୁରୁଣା କଟକ ସମ୍ବଲପୁର ରାସ୍ତା ନଡୁଆପଡା ଛକଠାରେ ଢେଙ୍କାନାଳ ପଟୁ ବାଇକରେ ଆସୁଥିବା ଢେଙ୍କାନାଳ ସଦର ବ୍ଲକର ମାଣିପୁର ଗ୍ରାମର ସନ୍ତୋଷ ବେହେରାଙ୍କ ପୁଅ ଓମ୍ ବେହେରା(୨୦) ଏବଂ ଅରୁଣ ସାହୁଙ୍କ ପୁଅ ପପୁ ସାହୁ (୨୦) ବିପରୀତ ଦିଗରୁ ଆସୁଥିବା ଏକ କାର ସହିତ ତାଙ୍କ ବାଇକ୍ ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣା ଘଟାଇ କାରଟି ସେଠାରୁ ଫେରାର ହୋଇ ଯାଇଥିବା ବେଳେ ଗୁରୁତର ଆହତ ଅବସ୍ଥାରେ ଉଭୟଙ୍କୁ ସ୍ଥାନୀୟ ଲୋକମାନେ ଉଦ୍ଧାର କରି ୧୦୮ ରୋଗୀବୁହା ଯାନ ଯୋଗେ ଆଠଗଡ଼ ଡ଼ାକ୍ତରଖାନାକୁ ପଠାଇଥିଲେ। ସେଠାରେ ତାଙ୍କର ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ଅଧିକ ଚିକିତ୍ସା ପାଇଁ କଟକ ବଡ଼ ଡ଼ାକ୍ତରଖାନାକୁ ପଠାଯାଇଥିଲା । ବାଟରେ ଯାଉଥିବା ବେଳେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଜଣଙ୍କର କଟକ ବଡ଼ ଡ଼ାକ୍ତରଖାନାରେ ପହଞ୍ଚିବା ପରେ ମୃତ୍ୟୁ ହୋଇଥିବା ଜଣାପଡିଛି । ଦୁଇଜଣଙ୍କ ମୃତ୍ୟୁକୁ ନେଇ ମାଣିପୁର ଅଞ୍ଚଳରେ ଶୋକର ଛାୟା ଖେଳିଯାଇଛି।
Comments are closed.