ଅପରାହ୍ନ ୨ଟାରେ ଭାରତ ଫେରିବେ ଅଭିନନ୍ଦନ, ୱାଘା ବର୍ଡରରେ ଉତ୍ସବର ମାହୋଲ
ନୂଆଦିଲ୍ଲୀ: ଭାରତୀୟ ସୀମା ଉଲ୍ଲଂଘନ କରି ଉଡୁଥିବା ଏକ ପାକିସ୍ତାନୀ ଯୁଦ୍ଧ ବିମାନକୁ ଘଉଡାଇବା ବେଳେ ଦୁର୍ଘଟଣାଗ୍ରସ୍ତ ହୋଇ ପିଓକେରେ ଖସିପଡ଼ିଥିବା ଭାରତୀୟ ବାୟୁସେନାର ମିଗ-୨୧ ବିମାନର ୱିଙ୍ଗ୍ କମାଣ୍ଡର ଅଭିନନ୍ଦନଙ୍କୁ ଆଜି ପାକିସ୍ତାନ ଭାରତକୁ ଫେରାଇବ। ୱାଘା ବର୍ଡର ଦେଇ ପାକିସ୍ତାନୀ ଯବାନମାନେ ଅପରାହ୍ନ ପ୍ରାୟ ୨ଟାରେ ଅଭିନନ୍ଦନଙ୍କୁ ଭାରତକୁ ହସ୍ତାନ୍ତର କରିବେ। ଏଥିପାଇଁ ୱାଘା ବର୍ଡରରେ ଉତ୍ସବର ମାହୋଲ ଦେଖିବାକୁ ମିଳିଛି। ଅଭିନନ୍ଦନଙ୍କୁ ସ୍ବାଗତ କରିବା ଲାଗି ଭାରତୀୟ ଯବାନମାନେ ପ୍ରତୀକ୍ଷା କରିଛନ୍ତି। ସୂଚନା ମୁତାବକ, ବିମାନ ଦୁର୍ଘଟଣାଗ୍ରସ୍ତ ହେବା ପରେ ଅଭିନନ୍ଦନ ସେଥିରୁ ବାହାରି ଆସିଥିଲେ। କିନ୍ତୁ ତାଙ୍କ ପାରାଚୁଟ ପିଓକେରେ ଖସିପଡ଼ିବାରୁ ସେଠାରୁ ପାକିସ୍ତାନୀ ସେନା ତାଙ୍କୁ ଗିରଫ କରିନେଇଥିଲା। ମାତ୍ର ଜେନେଭା ଚୁକ୍ତି ଅନୁସାରେ ଅଭିନନ୍ଦନକୁ ଉତ୍ତମ ବ୍ୟବହାର ସହ ତୁରନ୍ତ ଫେରାଇଦେବାକୁ ଭାରତ ପକ୍ଷରୁ ଦୃଢ଼ ଦାବି କରାଯାଇଥିଲା। ଅନ୍ୟପଟେ ତୁରନ୍ତ ପାଇଲଟଙ୍କୁ ଭାରତକୁ ଫେରାଇବାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମେତ ବିଭିନ୍ନ ରାଷ୍ଟ୍ର ପକ୍ଷରୁ ପାକିସ୍ତାନ ଉପରେ ଚାପ ପଡିଥିଲା। ବିଶେଷ କରି ନିଜକୁ ଏକଦା ପାକିସ୍ତାନର ସର୍ବକାଳୀନ ବନ୍ଧୁ ଦର୍ଶାଇଥିବା ଚୀନ ମଧ୍ୟ ଏ ନେଇ ଚାପ ପକାଇଥିଲା।