ରେଙ୍ଗାଲି: ରାଜ୍ୟ ଏବଂ କେନ୍ଦ୍ର ସରକାର ଗରିବ ଏବଂ ଅସହାୟ ପରିବାରଙ୍କୁ ପକ୍କା ଘର ନିର୍ମାଣ ପାଇଁ ପ୍ରଧାନମନ୍ତ୍ରୀ ଆବାସ, ବିଜୁ ପକ୍କା ଘର, ମୋ କୁଡିଆ ଆଦି ଅନେକ ଯୋଜନା କାର୍ଯ୍ୟକାରୀ କରି ଆସୁଛନ୍ତି। ତେବେ ଏତେ ଯୋଜନା ଥାଇ ସୁଦ୍ଧା ରେଙ୍ଗାଲି ବ୍ଳକ୍ କିନାଲୋଇ ପଞ୍ଚାୟତ ଅନ୍ତର୍ଗତ ଲୁହାଖଣ୍ଡି ଗ୍ରାମର ସଞ୍ଚୟ ଖମାରୀ (୨୦) ନାମକ ଯୁବକ ତାଙ୍କ ୭୮ ବର୍ଷ ବୟସ୍କ ବୃଦ୍ଧ ବାପା ଝୁମେର ଖମାରୀ ଓ ୭୫ ବର୍ଷ ବୟସ୍କା ବୃଦ୍ଧା ମାଆ ଜପା ଖମାରୀଙ୍କ ସହିତ ଭଙ୍ଗାଦଦରା ପଲିଥିନ ଢଙ୍କା ହୋଇଥିବା ଘରେ ଜୀବନ ଅତିବାହିତ କରୁଥିବା ଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ପଛୁଆ ବର୍ଗର ଗରିବ ପରିବାର ହୋଇଥିବା ଝୁମେର ଖମାରୀଙ୍କୁ ୨୦/୨୫ ବର୍ଷ ଆଗରୁ ଆବାସ ଯୋଜନାରେ ଘର ମିଳିଥିଲା ବୋଲି କହିଛନ୍ତି ତାଙ୍କର ପୁଅ ସଞ୍ଚୟ। ସେହି ଘର କିଛି ବର୍ଷ ହେଲା ଜରାଜୀର୍ଣ ତଥା ଭଙ୍ଗାଦଦରା ହୋଇ ଯିବାରୁ ଆବାସ ଯୋଜନାରେ ଅନ୍ୟ ଏକ ଘର ଯୋଗାଇ ଦେବାକୁ ସଞ୍ଚୟ ଅନେକ ଥର ପଞ୍ଚାୟତ ଏବଂ ବ୍ଳକକୁ ଧାଁ ଦୌଡ କରି ବାରମ୍ବାର ସରପଞ୍ଚ ଓ ବିଡିଓଙ୍କୁ ଅନୁରୋଧ କରିଥିଲେ ମଧ୍ୟ ତାଙ୍କୁ ଏଯାଏ ଘର ମିଳି ନାହିଁ ବୋଲି ସଞ୍ଚୟ କ୍ଷୋଭ ପ୍ରକାଶ କରିଛନ୍ତି। ଆର୍ଥିକ ସ୍ଥିତି ଦୁର୍ବଳ ଥିବାରୁ ନୁଆଁଘର ତିଆରି କରିବା କିମ୍ବା ଭଙ୍ଗା ଘର ମରାମତି କରିବାର ମୋର ସାମର୍ଥ୍ୟ ନାହିଁ। କାମଧନ୍ଦା କରି ଯାହା ମିଳୁଛି ସେଥିରେ ବାପା ମାଆ ଏବଂ ମୁଁ କଷ୍ଟେମଷ୍ଟେ ଚଳିଯାଉଛୁ। ଘର ତିଆରି କିମ୍ବା ମରାମତି କରିବା ଆମ ପାଇଁ ଅସମ୍ଭବ ହେଉଥିବାରୁ ଭଙ୍ଗାଦଦରା ଘରେ ଭାରି କଷ୍ଟରେ ବାପା ମାଆଙ୍କୁ ନେଇ ରହିବା ଛଡା ଆଉ କିଛି ଉପାୟ ନାହିଁ ବୋଲି ସଞ୍ଚୟ ଦୁଃଖର ସହିତ ମତ ପ୍ରକାଶ କରିଛନ୍ତି। ବିଭାଗୀୟ କର୍ତ୍ତୃପକ୍ଷଙ୍କ ଏଦିଗରେ ଦୃଷ୍ଟି ଦେଇ ଦୟନୀୟ ଅବସ୍ଥାରେରେ ରହୁଥିବା ଏହି ପରିବାରକୁ ଅଗ୍ରାଧିକାର ଭିତ୍ତିରେ ଘର ଯୋଗାଇ ଦେବାକୁ ରେଙ୍ଗାଲି ସଂଗ୍ରାମ ସମିତି ପକ୍ଷରୁ ଦାବି କରାଯାଇଛି।
Comments are closed.