୪୦ଡିଗ୍ରୀ ଟପିଲା ତାତି

ଭୁବନେଶ୍ୱର  : କିଛି ଦିନ ଧରି ରାଜ୍ୟରେ ଗ୍ରୀଷ୍ମପ୍ରବାହ ଆରମ୍ଭ ହୋଇଥିବାବେଳେ ବୁଧବାର ଏହା ୪୦ଡ଼ିଗ୍ରୀ ଅତିକ୍ରମ କରିଛି। ଭୁବନେଶ୍ୱର ସମେତ ୧୧ଟି ସହରର ତାପମାତ୍ରା ୩୯ଡ଼ିଗ୍ରୀ ଉପରେ ଥିବାବେଳେ ଦୁଇଟି ସହର ସମ୍ବଲପୁର ଓ ଟିଟିଲାଗଡ଼ର ସର୍ବାଧିକ ତାପମାତ୍ରା ୪୦ଡ଼ିଗ୍ରୀ ସେଲସିୟସ ଅତିକ୍ରମ କରିଛି। ତତଲାଗଡ଼ ଭାବେ ପରିଚିତ ଟିଟିଲାଗଡ଼ର ପାରଦ ଆଜି ସବୁଠୁ ଅଧିକ ୪୦.୫ଡ଼ିଗ୍ରୀ ରେକର୍ଡ଼ କରାଯାଇଛି। ସପ୍ତାହକ ପରେ ସାରା ରାଜ୍ୟରେ ତାପମାତ୍ରା ଆହୁରି ବଢ଼ିବ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି।
ଦୀର୍ଘଦିନ ଧରି ରାଜ୍ୟରେ ବର୍ଷା ନଥିବାବେଳେ ଅଧିକାଂଶ ସ୍ଥାନରେ ତାପମାତ୍ରା ୩୫ରୁ ୪୦ଡ଼ିଗ୍ରୀ ମଧ୍ୟରେ ରହୁଛି। ରାତି ସମୟରେ ତାପମାତ୍ରା ହ୍ରାସ ପାଉଥିଲେ ହେଁ ଦିନବେଳା ଖରା ସାଙ୍ଗକୁ ପ୍ରବଳ ଗୁଳୁଗୁଳି ଅନୁଭୂତ ହେଉଛି।
ଭୁବନେଶ୍ୱର ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ମିଳିଥିବା ସୂଚନା ଅନୁସାରେ ଆସନ୍ତା ତିନି ଦିନ ଧରି ରାଜ୍ୟର ବିଭିନ୍ନ ସ୍ଥାନରେ କାଳବୈଶାଖୀ ଅନୁଭୂତ ହେବା ସହିତ ପବନର ବେଗ ୫୦ରୁ ୬୦କିମି ମଧ୍ୟରେ ରହିବ ଏବଂ କେତେକ ସ୍ଥାନରେ କୁଆପଥର ବର୍ଷାର ସମ୍ଭାବନା ରହିଛି। ଆସନ୍ତାକାଲି ଉପକୂଳ ସମେତ ଉତ୍ତର ଓ ଦକ୍ଷିଣ ଓଡ଼ିଶାରେ କାଁ ଭାଁ ବର୍ଷା ସାଙ୍ଗକୁ କାଳବୈଶାଖୀ ପ୍ରଭାବ ଅନୁଭୂତ ହୋଇପାରେ। ୧୬ରେ ଉପକୂଳ ଓଡ଼ିଶା ସହିତ କେନ୍ଦୁଝର ଓ ମୟୂରଭଞ୍ଜରେ ଅନୁରୂପ ସ୍ଥିତି ଲାଗିରହିବ। ୧୭ରେ ରାଜ୍ୟର କିଛି ସ୍ଥାନରେ ସାମାନ୍ୟ ବର୍ଷା ହୋଇପାରେ ବୋଲି ଆକଳନ କରାଯାଇଛି।