ଯୋଡା : ଅଜଣା ପୋକ ସଂକ୍ରମଣରେ କେନ୍ଦୁଝର ଜିଲାର ପ୍ରାୟ ଅଞ୍ଚଳରେ ମକା ଫସଲ ବହୁଳ ମାତ୍ରାରେ କ୍ଷତିଗ୍ରସ୍ତ ହୋଇଥିବା ଅଭିଯୋଗ ହୋଇଛି। କେତେକ ଅଞ୍ଚଳରେ ମାସେ ପୂର୍ବରୁ ରୋପଣ ହୋଇଥିବା ମକା ଫସଲ ଅଧାରୁ ଅଧିକ ପରିମାଣର କ୍ଷତିଗ୍ରସ୍ତ ହୋଇଥିବା କୁହାଯାଉଛି। ଯୋଡା ବ୍ଲକ ଅନ୍ତର୍ଗତ ଗୋବିନ୍ଦପୁର ଗ୍ରାମର ଯୁବ ଚାଷୀ ସୁଧାଂଶୁ ସେଖର ସାମାଡ୍ ଅଭିଯୋଗ କରିଛନ୍ତି ଯେ ହଜାର ହଜାର ଟଙ୍କା ବ୍ୟୟରେ କୃଷିବିଭାଗ ଅଧିକାରୀଙ୍କ ଅନୁମୋଦନକ୍ରମେ ଉନ୍ନତମାନର ଶଙ୍କର ଜାତୀୟ ବିହନ କିଣି ମକା ଚାଷ କରିଥିଲେ। ମାତ୍ର ଅଜଣା ପୋକ ଆକ୍ରମଣରେ ଏବେ ଏହି ଫସଲ ନଷ୍ଟ ହୋଇଯାଇଛି। ଶ୍ରୀ ସାମାଡ୍ଙ୍କ ଭଳି କେନ୍ଦୁଝର ଜିଲାର ସଂଖ୍ୟାଧିକ ଚାଷୀ ବର୍ତ୍ତମାନ ମୁଣ୍ଡରେ ହାତଦେଇ ବସିଥିବାର ଖବର ମିଳିଛି। ଉଲ୍ଲେଖଯୋଗ୍ୟ ଯେ ଳିତ ବର୍ଷ ମୌସୁମୀ ବର୍ଷାର ଘୋର ଅନିୟମିତତା କାରଣରୁ ଅଦ୍ୟାବିଧି କେନ୍ଦୁଝର ଜିଲାର ଅଧିକାଂଶ ଅଞ୍ଚଳରେ ଧାନ ଋଆ କାର୍ଯ୍ୟ ଆରମ୍ଭ ହୋଇନି। ଏଭଳି ସମୟରେ ସମଗ୍ର କେନ୍ଦୁଝର ଜିଲାରେ ଚାଷୀ ଦ୍ୱିତୀୟ ବିକଳ୍ପ ଫସଲ ରୂପେ ମକା ମକା ଚାଷ କରିଛନ୍ତି। ମକା ଫସଲ ନିମନ୍ତେ ଧାନ ଅପେକ୍ଷା କମ ଜଳ ଆବଶ୍ୟକ ଥିବାରୁ ଚାଷୀକୂଳ ଏଭଳି ନିଷ୍ପତ୍ତିଗ୍ରହଣ କରିଥିବାର ଜଣାପଡିଛି।
ଏ ନେଇ କୃଷି ବିଭାଗ ଅଧିକାରୀଙ୍କୁ ଯୋଗେଯାଗ କରାଯିବା ପରେ ରାଜ୍ୟ ସରକାରଙ୍କ ପକ୍ଷରୁ ଚାଷୀମାନଙ୍କୁ ଏହି ନୂଆ ପୋକ ଆକ୍ରମଣ ଉପରେ ସଚେତନତା କରିବାକୁ ବ୍ଲକସ୍ତରୀୟ କର୍ମଶାଳାମାନ ଆୟୋଜନ କରାଯାଉଛି ବୋଲି କୃଷି ଅଧିକାରୀ କହିଥିଲେ। ତେବେ କର୍ମଶାଳା ଦ୍ୱାରା କୌଣସି ସୁଫଳ ମିଳିବ ନାହିିଁ ବୋଲି ବିରକଳା ଗ୍ରାମର ଅଗ୍ରଣୀ ଚାଷୀ ବିନୋଦ ବିହାରୀ ନାଏକ ଓ ଅନ୍ୟମାନେ କହିଛନ୍ତି। ପ୍ରାପ୍ତ ତଥ୍ୟ ଅନୁସାରେ ଚଳିତ ଖରିଫ ଋତୁରେ ସମଗ୍ର କେନ୍ଦୁଝର ଜିଲାର ପ୍ରାୟ ୬୫୦୦୦ ଏକରରୁ ଊର୍ଦ୍ଧ୍ବ ଜମିରେ ମକା ପସଲ ଚାଷ ହୋଇଛି।
Comments are closed.