ନୂଆଦିଲ୍ଲୀ : ଏସ୍ ସୁଧାକର ରେଡ୍ଡୀ ତୃତୀୟ ଥର ପାଇଁ ଭାରତୀୟ କମ୍ୟୁନିଷ୍ଟ ପାର୍ଟି (ସପିଆଇ)ର ମହାସଚିବ ହୋଇଛନ୍ତି । ରବିବାର ସର୍ବସମ୍ମତି କ୍ରମେ ସୁଧାକର ଏହି ପଦ ପାଇଁ ନିର୍ବାଚିତ ହୋଇଛନ୍ତି । ଜବାହାରଲାଲ ନେହରୁ ବିଶ୍ୱବିଦ୍ୟାଳୟ (ଜେଏନ୍ୟୁ)ର ପୂର୍ବତନ ଛାତ୍ରସଂସଦ ସଭାପତି କହ୍ନେୟା କୁମାରଙ୍କୁ ରାଷ୍ଟ୍ରୀୟ ପରିଷଦରେ ସ୍ଥାନ ମିଳିଛି । ୨୩ତମ ଦଳୀୟ ସମ୍ମିଳନୀରେ ୧୨୫ ସଦସ୍ୟତା ବିଶିଷ୍ଟ ରାଷ୍ଟ୍ରୀୟ ପରିଷଦ ପାଇଁ ନିର୍ବାଚନ ହୋଇଥିଲା । ଏଥିରେ ଜେଏନ୍ୟୁ ଛାତ୍ର ସଂସଦ ପୂର୍ବତନ ସଭାପତି କହ୍ନେୟା କୁମାର ନିର୍ବାଚିତ ହୋଇଥିଲେ । ଏହାପରେ ସର୍ବସମ୍ମତି କ୍ରମେ ସୁଧାକର ରେଡ୍ଡୀ ମହାସଚିବ ପଦରେ ନିର୍ବାଚିତ ହୋଇଥିଲେ । ଦୁଇ ଥର ଲୋକସଭା ସାଂସଦ ଭାବେ ନିର୍ବାଚିତ ହୋଇଥିବା ସୁଧାକର ରେଡ୍ଡୀ ପ୍ରଥମ ଥର ୨୦୧୨ରେ ସିପିଆଇ ମହାସଚିବ ହୋଇଥିଲେ । ଚଳିତ ଥର ବିନା ପ୍ରତିଦ୍ୱନ୍ଦ୍ୱିତାରେ ସୁଧାକର ନିର୍ବାଚିତ ହୋଇଛନ୍ତି । ତେବେ ସିପିଆଇର ଚୂଡାନ୍ତ ନିଷ୍ପତ୍ତି ନେଉଥିବା କମିଟିରେ କେରଳର ବରିଷ୍ଠ ସଦସ୍ୟ ସି. ଦିବାକରନଙ୍କ ନାମ ନଥିବାରୁ ବିରୋଧ ପ୍ରଦର୍ଶନ କରାଯାଇଥିଲା ।
