ଶପଥଗ୍ରହଣ ଉତ୍ସବରେ ସାହାଯ୍ୟ ପାଇଁ ସ୍ମୃତି ଇରାନୀଙ୍କୁ ଟ୍ବିଟ୍ କରି ଧନ୍ୟବାଦ ଜଣାଇଲେ ଆଶା ଭୋସଲେ

ମୁମ୍ବଇ : ବଲିଉଡ଼ର ଲୋକପ୍ରିୟ କଣ୍ଠଶିଳ୍ପୀ ଆଶା ଭୋସଲେ ଗୁରୁାବର ମୋଦୀ ସରକାରଙ୍କ ମନ୍ତ୍ରୀମଣ୍ଡଳ ଶପଥଗ୍ରହଣ ଉତ୍ସବରେ ଯୋଗ ଦେଇଥିଲେ। ଏହା ରାଷ୍ଟ୍ରପତି ଭବନ ପରିସରରେ ଅନୁଷ୍ଠିତ ହୋଇଥିଲା। ତେବେ ରାତି ୯ଟାରେ କାର୍ଯ୍ୟକ୍ରମ ଶେଷ ହୋଇଥିଲା। ଅତ୍ୟଧିକ ଭିଡ଼ ଯୋଗୁଁ ଆଶା  ଭିଡ଼ରେ ଫଶି ଯାଇଥିଲେ। ସେ କିପରି ସେଥିରୁ ବାହାରିବେ ଜାଣିପାରୁ ନ ଥିଲେ। ଏଭଳି ଏକ ସମୟରେ ସ୍ମୃତି ଇରାନୀ ତାଙ୍କୁ ସହାୟତାର ହାତ ବଢାଇଥିଲେ। ସେ ଆଶାଙ୍କୁ ସୁରକ୍ଷିତ ଭାବେ ଘରେ ପହଞ୍ଚାଇବା ପାଇଁ ସମସ୍ତ ପ୍ରକାର ବନ୍ଦୋବସ୍ତ କରିଥିଲେ। ଏହାକୁ ନେଇ ଆଶା ସ୍ମୃତିଙ୍କୁ ଧନ୍ୟବାଦ ଦେବାସହ ଏନେଇ ଟ୍ବିଟରରେ ସ୍ମୃତିଙ୍କ ସହ ଏକ ଫଟୋ ଶେୟାର କରି ଲେଖିଛନ୍ତି- ଶପଥଗ୍ରହଣ ଉତ୍ସବରେ ମୁଁ ବାଟବଣା ହୋଇଯାଇଥିଲି। ମାତ୍ର ମୋତେ ସାହାଯ୍ୟ କରିବାକୁ କେହି ଆଗକୁ ଆସିନଥିଲେ। ଏହି ସମୟରେ ସ୍ମୃତି ମୋତେ ସହାୟତାର ହାତ ବଢାଇଥିଲେ।। ସେ ମୋତେ ଭିଡ଼ ଭିତରୁ ବାହାର କରିଥିଲେ। ସ୍ମୃତି ଇରାନୀ ମୋତେ ସାହାଯ୍ୟ କରିଥିବାରୁ ଧନ୍ୟବାଦ। ଏହାର ଜବାବରେ ସ୍ମୃତି ହାତ ଜୋଡ଼ିଥିବା ଏକ ଇମୋଜୀ ଶେୟାର କରିଛନ୍ତି।

I was stranded in the crazy rush post PM oath ceremony. No one offered to help me except @smritiirani who saw my plight & made sure I reached home safely. She cares & that’s why she won. pic.twitter.com/vDV84PrIVp

— ashabhosle (@ashabhosle) May 30, 2019

ଗୁରୁବାର ନୂତନ ମନ୍ତ୍ରୀମଣ୍ଡଳ ଶପଥଗ୍ରହଣ ସମାରୋହରେ ଦେଶ ତଥା ବିଦେଶର ବଡ଼ ବଡ଼ ରାଜନେତାମାନେ ଯୋଗ ଦେଇଥିଲେ। ବଲିଉଡ୍‌ର ନିର୍ଦ୍ଦେଶକ, ପ୍ରଯୋଜକ, ଅଭିନେତା, ଅଭିନେତ୍ରୀ ତଥା ହାସ୍ୟଅଭିନେତା ମଧ୍ୟ ଏଥିରେ ସାମିଲ ହୋଇଥିଲେ। ସେମାନଙ୍କ ମଧ୍ୟରେ କଙ୍ଗନା ରାଣାଓ୍ବତ, କରନ୍‌ ଜୋହର, ଦିବ୍ୟା କୁମାର ଖୋସଲା, ଅନୁପମ ଖେର, ଅନିଲ କପୁର, ରାଜକୁମାର ହିରାନୀ, ଶାହିଦ କପୁର ପ୍ରମୁଖ ରହିଥିଲେ। ଏଥିରେ ଭାରତର ଉଦ୍ୟୋଗପତି ମୁକେଶ ଅମ୍ବାନୀଙ୍କ ପରିବାର ମଧ୍ୟ ଉପସ୍ଥିତ ଥିଲେ।