ନୂଆଦିଲ୍ଲୀ: ଶ୍ରୀଲଙ୍କାର ବିଭିନ୍ନ ଚର୍ଚ୍ଚ ଓ ପଞ୍ଚ ତାରକା ହୋଟେଲରେ ହୋଇଥିବା ସିରିଜ ବୋମା ବିସ୍ଫୋରଣକୁ ନିନ୍ଦା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଭୋଟରମାନେ ତାଙ୍କୁ ଦ୍ଵିତୀୟ ଥର ନିର୍ବାଚିତ କରିବା ଦରକାର କାରଣ ଭାରତ ପ୍ରତି ବିପଦ ସୃଷ୍ଟି କରୁଥିବା ଆତଙ୍କବାଦର ସେ ହିଁ ଦମନ କରିପାରିବେ। ରବିବାର ସନ୍ଧ୍ୟାରେ ରାଜସ୍ଥାନରେ ଅନୁଷ୍ଠିତ ନିର୍ବାଚନୀ ରାଲିରେ ଉଦବୋଧନ ଦେଇ ମୋଦୀ ପଚାରିଥିଲେ, ଆତଙ୍କବାଦ ଶେଷ ହେବ ଉଚିତ କି ନୁହେଁ? କିଏ ସେ କାମ କରିପାରିବ? ମୋଦୀ ବ୍ୟତୀତ ଅନ୍ୟ କେହି ଏ କାମ କରିପାରିବ କି?
ଚଳିତ ଲୋକସଭା ନିର୍ବାଚନରେ ପ୍ରଧାନମନ୍ତ୍ରୀ ମୋଦୀ ଓ ଭାରତୀୟ ଜନତା ପାର୍ଟି ଜାତୀୟ ସୁରକ୍ଷା ସମ୍ପର୍କିତ ପଦକ୍ଷେପକୁ ମୁଖ୍ୟ ଆୟୁଧ ରୂପେ ବ୍ୟବହାର କରି ଭୋଟରମାନଙ୍କୁ ସାମ୍ନା କରୁଥିବା ବେଳେ ଅନ୍ୟ ପ୍ରମୁଖ ବିରୋଧୀ ରାଜନୈତିକ ଦଳଗୁଡିକ କୃଷକ ସମସ୍ୟା, ବେରୋଜଗାରୀ ଭଳି ପ୍ରସଙ୍ଗ ଉପସ୍ଥାପନ କରୁଛନ୍ତି।
