ରୋମ ..- ଇଟାଲୀରେ ମହିଳା ଓ ପୁରୁଷଙ୍କ ପାଇଁ ପୃଥକ ଟିଭି ଚ୍ୟାନେଲ ଲଞ୍ଚ କରିବା ପାଇଁ ଯୋଜନା କରାଯାଇଛି । ସରକାରୀ ପ୍ରସାରଣକାରୀ ସଂସ୍ଥା ରାଇ ନିଜର ଦର୍ଶକଙ୍କ ସଂଖ୍ୟା ବୃଦ୍ଧି କରିବା ପାଇଁ ଏହି ଯୋଜନା କରିଥିବା ସୂଚନା ମିଳିଛି ।
ମହିଳା ଓ ପୁରୁଷଙ୍କ ପାଇଁ ଏହି ଚ୍ୟାନେଲମାନଙ୍କରେ ପୃଥକ କାର୍ଯ୍ୟକ୍ରମ ସହ ଚଳଚ୍ଚିତ୍ର ପରିବେଷଣ କରାଯିବ ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛି । ଏପରି କଲେ ଦର୍ଶକ ତାଙ୍କର ମନପସନ୍ଦର କାର୍ଯ୍ୟକ୍ରମ ଦେଖିପାରିବେ । ବିଜ୍ଞାପନଦାତା ତାଙ୍କ ମନ ମୁତାବକ ଚ୍ୟାନେଲକୁ ନିଜର ବିଜ୍ଞାପନ ଦେଇ ପାରିବେ । ଏହାକୁ ଇଟାଲୀରେ ଅନେକ ଲୋକ ବିରୋଧ କରିଛନ୍ତି । କିଛି ମହିଳା ସଙ୍ଗଠନ ରାଇର ଏପରି ନିଷ୍ପତ୍ତିକୁ ବିରୋଧ କରିଛନ୍ତି । ଏପରି କଲେ ଲିଙ୍ଗଗତ ଅସମାନତା ବୃଦ୍ଧି ପାଇବ ବୋଲି ମହିଳା ସଙ୍ଗଠନମାନଙ୍କ ପକ୍ଷରୁ କୁହାଯାଇଛି ।
