ନୂଆଦିଲ୍ଲୀ: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଏନ. ଡି. ତିୱାରୀଙ୍କ ପୁଅ ରୋହିତ ଶେଖରଙ୍କ ସନ୍ଦେହ ଜନକ ମୃତ୍ୟୁ ଘଟଣାରେ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ତାଙ୍କର ଅସ୍ୱାଭାବିକ ମୃତ୍ୟୁ ହୋଇଥିବା ଜଣାପଡିଛି। ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ (ଏମ୍ସ) ଦ୍ୱାରା କରାଯାଇଥିବା ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ଏହି ମାମଲାର ତଦନ୍ତ ଦାୟିତ୍ୱ କ୍ରାଇମ ବ୍ରାଞ୍ଚକୁ ଦିଆଯାଇଛି। ପୁଲିସ ଧାରା ୩୦୨ରେ ହତ୍ୟା ମାମଲା ରୁଜ୍ଜୁ କରିଛି। ମିଳିଥିବା ସୂଚନା ଅନୁଯାୟୀ, କ୍ରାଇମବ୍ରାଞ୍ଚର ଜଣେ ବରିଷ୍ଠ ଅଧିକାରୀ ଶୁକ୍ରବାର ରୋହିତଙ୍କ ବାସଭବନ ଯାଞ୍ଚ କରିବା ସହ ତାଙ୍କ ମୃତ୍ୟୁର କାରଣ ଖୋଜୁଛି। ଶବ ବ୍ୟବଚ୍ଛେଦ ରିପୋର୍ଟରେ ମୃତ୍ୟୁର କାରଣ ଶ୍ବାସରୁଦ୍ଧ ଦର୍ଶାଯାଇଥିବା ବେଳେ, କୌଣସି ବସ୍ତୁ ଦ୍ୱାରା ତାଙ୍କ ତଣ୍ଟି ଉପରେ ଚାପ ପ୍ରୟୋଗ ପରେ ମୃତ୍ୟୁ ଘଟିଥିବା ସ୍ପଷ୍ଟ କରାଯାଇଛି।
ଗତ ମଙ୍ଗଳବାର ୪୦ ବର୍ଷୀୟ ରୋହିତଙ୍କ ମୃତ୍ୟୁ ପରେ ତାଙ୍କ ମାଆ କହିଥିଲେ ଯେ ତାଙ୍କ ପୁଅର ସ୍ୱାଭାବିକ ମୃତ୍ୟ ହୋଇଛି କିନ୍ତୁ ସେଥିପାଇଁ ଯେଉଁମାନେ ଦାୟୀ ସେମାନଙ୍କ ନାମ ସେ ପରେ ପ୍ରକାଶ କରିବେ। ଏମ୍ସର ପାଞ୍ଚ ଜଣ ଡାକ୍ତରଙ୍କୁ ନେଇ ଗଠିତ କମିଟି କହିଛନ୍ତି, ଏହି ମୃତ୍ୟୁ ଆକସ୍ମିକ ଅସ୍ୱାଭାବିକ ମୃତ୍ୟୁ ଯାହାକୁ ହତ୍ୟା ଶ୍ରେଣୀଭୁକ୍ତ କରାଯାଇଛି।
