ନୂଆଦିଲ୍ଲୀ: ମସଜିଦରେ ମୁସଲିମ ମହିଳାଙ୍କୁ ନମାଜ ପାଠ ପାଇଁ ଅନୁମତି ଦେବା ମାମଲାରେ ସର୍ବୋଚ୍ଚ ନ୍ୟାୟାଳୟ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି। ଜଷ୍ଟିସ ଏସ. ଏ. ବୋବଡେ ଏବଂ ଜଷ୍ଟିସ ଏସ. ଅବଦୁଲ ନଜିରଙ୍କୁ ନେଇ ଗଠିତ ଖଣ୍ଡପୀଠ ପୁଣେ ସହରର ଏକ ଦମ୍ପତିଙ୍କ ଦ୍ୱାରା ଦାୟର ମାମଲାରେ କେନ୍ଦ୍ର ସରକାର, ୱାକଫ ବୋର୍ଡ ଏବଂ ଅଲ ଇଣ୍ଡିଆ ମୁସଲିମ ପର୍ସନାଲ ଲ ବୋର୍ଡକୁ ଏହି ନୋଟିସ ଜାରି କରିଛନ୍ତି। ଖଣ୍ଡପୀଠ କହିଛନ୍ତି ଯେ, ସୁପ୍ରିମକୋର୍ଟ ଶବରୀମାଳା ମନ୍ଦିର ମାମଲା ବିଚାର କରୁଥିବାରୁ ଏହି ମାମଲାର ମଧ୍ୟ ବିଚାର କରିବେ। ମାମଲା ଦାୟର କରିଥିବା ଦମ୍ପତି, ମସଜିଦରେ ମହିଳାଙ୍କ ନମାଜ ପାଠ ଉପରେ ଜାରି କରାଯାଇଥିବା ପ୍ରତିବନ୍ଧକକୁ ବେନିୟମ ଓ ଅସାମ୍ବିଧାନିକ ଘୋଷଣା କରିବାକୁ ନ୍ୟାୟାଳୟକୁ ଅନୁରୋଧ କରିଛନ୍ତି। ସମ୍ବିଧାନ ଅନୁଯାୟୀ ଧର୍ମ, ଜାତି, ବର୍ଗ, ଲିଙ୍ଗ ଏବଂ ଜନ୍ମସ୍ଥାନକୁ ନେଇ କୌଣସି ଭେଦଭାବ ନ ହେବା ଉଚିତ ବୋଲି ସେହି ଦମ୍ପତି ନ୍ୟାୟାଳୟଙ୍କୁ ପ୍ରାର୍ଥନା କରିଛନ୍ତି।
ମାମଲାର ଶୁଣାଣି ସମୟରେ ବିଦେଶରେ ମୁସଲିମ ମହିଳାଙ୍କୁ ମସଜିଦ ପ୍ରବେଶରେ କଟକଣା ଅଛି କି ନାହିଁ ଖଣ୍ଡପୀଠ ଜାଣିବାକୁ ଚାହିଁଥିଲେ ଏବଂ ଆବେଦନକାରୀଙ୍କ ଓକିଲ କହିଥିଲେ ଯେ ପବିତ୍ର ମକ୍କା ଏବଂ କାନାଡ଼ାରେ ଥିବା ମସଜିଦରେ ମୁସଲିମ ମହିଳାଙ୍କ ପ୍ରବେଶ ଅନୁମତି ରହିଛି। ଖଣ୍ଡପୀଠଙ୍କ ଅନ୍ୟ ଏକ ପ୍ରଶ୍ନରେ ଆବେଦନକାରୀଙ୍କ ଓକିଲ କହିଥିଲେ ଯେ ଭାରତରେ ଥିବା ମସଜିଦଗୁଡିକ ସରକାରଙ୍କଠାରୁ ଅନୁଦାନ ଗ୍ରହଣ କରିଥାନ୍ତି।
