ଖୁଣ୍ଟା : ରଜ ପର୍ବରେ ଦର୍ଶକଙ୍କୁ ନୂଆ ଓଡିଆ ସିନେମା ଭେଟି ଦେବା ପାଇଁ ମୟୂରଭଞ୍ଜ ଜିଲା ଖୁଣ୍ଟା ବ୍ଲକରେ କୁହୁ ସିନେ ଫ୍ଲିକ୍ସ ଦ୍ୱାରା ‘ତୁ ମୋ ଲଭ ଷ୍ଟୋରୀ-୨’ର ଶୁଭ ମହୁରତ ବୁଧବାର ଅନୁଷ୍ଠିତ ହୋଇଯାଇଛି। ବ୍ଲକର ତାଡିକି ଗ୍ରାମର ତାଡକେଶ୍ୱର ଶୈବ ପୀଠରେ ସେଥିପାଇଁ ଆବଶ୍ୟକ ପ୍ରସ୍ତୁତି କରା ଯାଇଥିଲା। କୁହୁ ସିନେ ଫ୍ଲିକ୍ସ ନିବେଦିତ ତଥା ଶୁଭେନ୍ଦୁ ସାହୁ ପ୍ରଯୋଜିତ ଏହି ସିନେମାର କାହାଣୀ, ଚିତ୍ରନାଟ୍ୟ ଓ ନିଦେର୍ଶନା ଦେଇଛନ୍ତି ତାପସ ସରଘରିଆ। ତେବେ ପୂର୍ବରୁ ତାପସଙ୍କ ଦ୍ୱାରା ନିର୍ଦେଶିତ ତୁମୋ ଲଭଷ୍ଟୋରୀର ଯୋଡି ସ୍ୱରାଜ – ଭୂମୀକାଙ୍କୁ ଏଥିରେ ପୁଣିଥରେ ସୁଯୋଗ ଦିଆଯାଇଥିବା ବେଳେ ତାଙ୍କ ନିର୍ଦେଶିତ ଅନ୍ୟ ଏକ ଚଳଚିତ୍ର ପହିଲି ରଜର ଯୋଡି ସିଦ୍ଧାନ୍ତ ମହାପାତ୍ର ଓ ଅନୁ ଚୌଧୂରୀ ମଧ୍ୟ ଅଭିନୟ କରିବେ। ଅନ୍ୟମାନଙ୍କ ମଧ୍ୟରେ ମଣ୍ଟୁ, ପାର୍ଥ, ଶକ୍ତି ବରାଳ ପ୍ରମୁଖ ଅଭିନୟ କରୁଥିବା ବେଳେ ଚଳଚ୍ଚିତ୍ରର ସୁଟିଂ ଓଡ଼ିଶା ସମେତ ଆଣ୍ଡାମାନ ନିକୋବର ଦ୍ୱୀପପୁଞ୍ଜ, କ୍ରୁଇଜ ଜାହାଜରେ ହେବ। ଛଅ ଗୋଟି ଗୀତ ସହିତ ସିନେମାଟି ନୂଆ ଧରଣର ପ୍ରେମ କାହାଣୀ ଉପରେ ଆଧାରିତ ହୋଇଥିବା ବେଳେ ତାହା ଓଡିଆ ସିନେ ପ୍ରେମୀଙ୍କୁ ନିଶ୍ଚିତ ଭଲ ଲାଗିବ ବୋଲି ନିଦେର୍ଶକ ତାପସ ସରଘରିଆ କହିଛନ୍ତି। କ୍ୟାମେରା ନିଦେର୍ଶନା ରବିନ୍ଦ୍ର ବେହେରା, ସଂଳାପ ଦିଲିପ ଚୌଧୁରୀ, ନୃତ୍ୟ ନିର୍ଦେଶନା ଗିରିଶ ମହାନ୍ତି, ସଂଗୀତ ନିର୍ଦେଶନା ପ୍ରେମାନନ୍ଦ ଓ ବସନ୍ତରାଜ ସାମଲ ଗୀତ ରଚନା କରିଛନ୍ତି। ପ୍ରେଯୋଜକ ଶୁଭେନ୍ଦୁ ସାହୁ ପୂର୍ବରୁ ଦୁଇ ଗୋଟି ଚଳଚ୍ଚିତ୍ରରେ ସହ ପ୍ରେଯାଜକ ରହିସାରିଥିବା ବେଳେ ପ୍ରଥମ ଥର ପାଇଁ ନିଜର ପ୍ରଯୋଜନାସଂସ୍ଥା କୁହୁ ସିନେ ଫ୍ଲିକ୍ସ ଦ୍ୱରା ତୁ ମୋ ଲଭ ଷ୍ଟୋରୀ-୨ ନିର୍ମାଣ କରୁଥିବା ଓ ତରଙ୍ଗ ସିନେ ପ୍ରଡକ୍ସନ ଏଥିରେ ସହାୟତା କରୁଥିବା କହିଛନ୍ତି। ତେବେ ଏହି ଚଳଚ୍ଚିତ୍ରଟି ପୂର୍ବ ଚଳଚିତ୍ରର ସିକୁଏଲ ନୁହେଁ ବୋଲି ନିର୍ଦେଶକ ତାପସ ସରଘରିଆ ସ୍ପଷ୍ଟ କରିଛନ୍ତି।
Comments are closed.