ମୁଜାଫରନଗର: ବିରିୟାନି ପାଇଁ କଂଗ୍ରେସ କର୍ମୀଙ୍କ ମଧ୍ୟରେ ମାରପିଟ୍ ହୋଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ଉତ୍ତରପ୍ରଦେଶର ମୁଜାଫରନଗରରେ। ପୂର୍ବତନ ବିଧାୟକ ମୌଲାନା ଜମିଲଙ୍କ ବାସଭବନରେ ଏକ ନିର୍ବାଚନୀ ସଭା ଆୟୋଜିତ ହୋଇଥିଲା। ଏଥିରେ କଂଗ୍ରେସ ପ୍ରାର୍ଥୀ ନାସିମୁଦ୍ଦିନ ସିଦ୍ଦିକିଙ୍କ ସମର୍ଥକମାନେ ଯୋଗଦେଇଥିଲେ। ସଭା ପରେ କର୍ମୀମାନଙ୍କୁ ବିରିୟାନୀ ବଣ୍ଟନ କରିବାର ବ୍ୟବସ୍ଥା ହୋଇଥିଲା। ସେଥିପାଇଁ ବିରିୟାନି ପ୍ୟାକେଟ ଆସି ପହଞ୍ଚିଥିଲା। କିନ୍ତୁ ଅଧିକାଂଶ କର୍ମୀ ଜିଦ କରିଥିଲେ ଯେ, ସଭା ପୂର୍ବରୁ ସେମାନଙ୍କୁ ବିରିୟାନୀ ପ୍ୟାକେଟ ଦିଆଯାଉ। ମାତ୍ର ବିରିୟାନୀ ବଣ୍ଟନ ଦାୟିତ୍ଵରେ ଥିବା କେତେକ କର୍ମୀ ଏହାକୁ ବିରୋଧ କରିଥିଲେ। ଫଳରେ ସେମାନଙ୍କୁ ବିରିୟାନି ମିଳି ନ ଥିଲା। ଏହାକୁ ନେଇ ଉଭୟ ପକ୍ଷଙ୍କ ମଧ୍ୟରେ ମାରପିଟ ହୋଇଥିଲା। ସଭାସ୍ଥଳ ରଣକ୍ଷେତ୍ର ପାଲଟିଥିଲା। ଖବର ପାଇ ପୋଲିସ ସେଠାରେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିଲା। ଏହି ଘଟଣା ପାଇଁ ପୁଲିସ ପୂର୍ବତନ ବିଧାୟକ ଜମିଲ ଏବଂ ତାଙ୍କ ପୁଅ ନଇମ ଅହମ୍ମଦଙ୍କ ସମେତ ୩୪ ଜଣଙ୍କ ନାମରେ ମାମଲା ରୁଜୁ କରିଛି।
ଅନ୍ୟପଟେ ନିର୍ବାଚନୀ ସଭାରେ ବିରିୟାନି ବଣ୍ଟନ ଉପରେ ନିର୍ବାଚନ ଆୟୋଗ କଟକଣା ଲଗାଇଛନ୍ତି। ଏଥିପାଇଁ ଅନୁମତି ନେବାକୁ ପଡ଼ିବ ବୋଲି ଆୟୋଗ କହିଛନ୍ତି। କିନ୍ତୁ କଂଗ୍ରେସ ଏହି ସଭାରେ ବିରିୟାନୀ ବଣ୍ଟନ ପାଇଁ ଅନୁମତି ନେଇ ନ ଥିବାରୁ ଆୟୋଗଙ୍କ ପକ୍ଷରୁ ନିଜ ଆଡୁ ଏକ ଅଭିଯୋଗ ଦାଖଲ କରାଯାଇଛି।
