ନୂଆଦିଲ୍ଲୀ: ଆତ୍ମ ଘୋଷିତ ଧର୍ମଗୁରୁ ବୀରେନ୍ଦ୍ର ଦେବ ଦୀକ୍ଷିତଙ୍କ ସମ୍ପର୍କରେ କୌଣସି ସୂଚନା ପାଇଁ ସିବିଆଇ ୫ଲକ୍ଷ ଟଙ୍କା ପୁରସ୍କାର ଘୋଷଣା କରିଛି। ନିଜ ଶିଷ୍ୟାଙ୍କୁ ବଳାତ୍କାର ଅଭିଯୋଗରେ ସିବିଆଇ ବିରେନ୍ଦ୍ରକୁ ଗିରଫ କରିବା ପାଇଁ ଖିଜଉଥିବା ଜଣାପଡିଛି। ସିବିଆଇ ମୁଖପାତ୍ର ନିତିନ ୱାକଙ୍କର କହିଛନ୍ତି ଯେ ଏ ସମ୍ପର୍କରେ ଫୋନ ନମ୍ବର ୦୧୧-୨୪୩୬୮୬୫୭, ଫ୍ୟାକ୍ସ ୦୧୧୨୪୩୬୮୬୬୨ ଏବଂ ଇମେଲ spstfdel@cbi.gov.in ଜରିଆରେ ଯେ କେହି ସୂଚନା ପ୍ରଦାନ କରିପାରିବେ। ସୂଚନା ପ୍ରଦାନକାରୀଙ୍କ ପରିଚୟ ଗୋପନ ରଖାଯିବ।
ସୂଚନା ଯୋଗ୍ୟ, ୭୭ ବର୍ଷୀୟ ଦୀକ୍ଷିତ ଆଧ୍ୟାତ୍ମିକ ଈଶ୍ୱରୀୟ ବିଶ୍ୱ ବିଦ୍ୟାଳୟ ନାମରେ ଆଶ୍ରମ ଗଠନ କରି ଅନେକ ମହିଳାଙ୍କୁ ବଳପୂର୍ବକ ବନ୍ଦୀ କରି ରଖିବା ସହ ସେମାନଙ୍କୁ ନିର୍ଯ୍ୟାତନା ଦେଉଥିଲେ। ତାଙ୍କ ବିରୁଦ୍ଧରେ ଦୁଇ ଦୁଇ ଥର ଲୁକ ଆଉଟ ନୋଟିସ ଜାରି କରାଯାଇଥିଲେ ମଧ୍ୟ ସିବିଆଇ ତାଙ୍କୁ ଠାବ କରି ପାରିନାହିଁ। ସେ ସମ୍ଭବତଃ ନେପାଳ ପଳେଇ ଯାଇ ପାରିଥାନ୍ତି ବୋଲି ଅନୁମାନ କରାଯାଉଛି।
