ମୋହନା : ଗଜପତି ଜିଲ୍ଲା ଅଡବା ଓ ଆର.ଉଦୟଗିରି ଥାନା ପୁଲିସ୍ ମିଳିତ ଭାବେ ପେଟ୍ରୋଲିଂ ସମୟରେ ରବିବାର ସକାଳୁ ବିରିକୋଟ ପଞ୍ଚାୟତ ଅନ୍ତର୍ଗତ ଖ୍ରୀଷ୍ଟପୁର ଗାଁ ନିକଟରେ ଏକ ଟ୍ରକ (ଓଆର ୧୦-ଜି- ୭୨୯୯)ରୁ ୫ କ୍ୱିଣ୍ଟାଲ ୫୦ କେଜି ଗଞ୍ଜେଇ ଜବତ ହୋଇଛି। ଉଭୟ ଥାନାର ପୁଲିସ୍ ଚୋରା ଗଞ୍ଜେଇ ଚାଲାଣରେ ସଂପୃକ୍ତ ୪ ଜଣଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ ଆର.ଉଦୟଗିରି ଥାନା ତାଣ୍ଡ୍ରାଙ୍ଗ ଗାଁର ସୁଜୟ ଲିମା(୨୩), ଅଜୟ ଲିମା(୨୨), ରଂଜନ ବୀର(୨୩) ଓ ଜଣେ ନାବାଳକ। ଅଭିଯୁକ୍ତମାନେ ତାଣ୍ଡ୍ରାଙ୍ଗ ଅଞ୍ଚଳରୁ ଟ୍ରକରେ ଗଂଜେଇ ଜଙ୍ଗଲିଆ ରାସ୍ତା ଗୁଲୁବା ଅଞ୍ଚଳ ଦେଇ କଟକ, ଭୁବନେଶ୍ୱରକୁ ଚୋରା ଚାଲାଣ କରୁଥିବା ସମୟରେ ଖ୍ରୀଷ୍ଟପୁର ଗ୍ରାମ ନିକଟରେ ଅଡ଼ବା ଓ ରା.ଉଦୟଗିରି ପୁଲିସ୍ର ମିଳିତ ଟିମ୍ ଉକ୍ତ ଟ୍ରକଟିକୁ ସନ୍ଦେହରେ ଅଟକାଇ ଯାଞ୍ଚ କରିଥିଲେ। ଏହି ସମୟରେ ଉକ୍ତ ଟ୍ରକ୍ରୁ ୫ କ୍ୱିଣ୍ଟାଲ ୫୦ କେଜି ଗଞ୍ଜେଇ ଜବତ କରିଥିଲେ। ଏହି ଗଂଜେଇର ଆନୁମାନିକ ମୁଲ୍ୟ ୧୬ ଲକ୍ଷଟଙ୍କାରୁ ଊର୍ଦ୍ଧ୍ବ ହେବ ବୋଲି ରା. ଉଦୟଗିରି ଏସଡିପିଓ ଅଶୋକ ମହାନ୍ତି ସୂଚନା ଦେଇଛନ୍ତି। ସମସ୍ତ ଅଭିଯୁକ୍ତଙ୍କୁ ମୋହନା କୋର୍ଟକୁ ଚାଲାଣ କରାଯାଇଛି।
