ବଲାଙ୍ଗିର: ବୌଦ୍ଧ ଜିଲ୍ଲା କଣ୍ଟାମାଳ ଅଞ୍ଚଳରୁ ମଧ୍ୟପ୍ରଦେଶ ଅଞ୍ଚଳକୁ ବୋଲେରୋରେ ଗଞ୍ଜେଇ ଚାଲାଣ କରାଯାଉଥିବା ବେଳେ ବଲାଙ୍ଗିର ଜିଲ୍ଲା ପୁଇଁନ୍ତଲା ପୁଲିସ ହାତରେ ଧରାପଡ଼ିଛି । ପୁଲିସ ଗଞ୍ଜେଇ ସହ ବୋଲେରୋ ଜବତ କରି ଜଣେ ଅଭିଯୁକ୍ତକୁ ଗିରଫ କରିଛି । ଅଭିଯୁକ୍ତ ଜଣକ ବରଗଡ଼ ଜିଲ୍ଲା ପାଇକମାଳ ଅଞ୍ଚଳର ବିଧି ସାହୁ ହୋଇଥିବା ଥାନା ଅଧିକାରୀ ଅନିତା ପଧାନ ସୂଚନା ଦେଇଛନ୍ତି ।
ସୂଚନା ଅନୁସାରେ, ଆଜି ସକାଳେ ପୁଇଁନ୍ତଲା ପୁଲିସ ପକ୍ଷରୁ ଛତାପିପଲ୍ ଓ କୁରେଭନା ଅଞ୍ଚଳରେ ପାଟ୍ରୋଲିଂ କରାଯାଉଥିଲା । ମଧ୍ୟପ୍ରଦେଶ ପଞ୍ଜିକରଣ ନମ୍ବର ଥିବା ଏକ ବୋଲେରୋ ସନ୍ଦେହଜନକ ଭାବେ ଆସୁଥିବାରୁ ପୁଲିସ ସନ୍ଦେହ କରିଥିଲା । ପରେ ଗାଡ଼ିକୁ ପିଛା କରି ସକାଳ ୮ଟାରେ ଅଟକାଇ ଯାଞ୍ଚ କରାଯାଇଥିଲା । ବୋଲେରୋ ତଳେ ଗଞ୍ଜେଇ ପୁଡ଼ିଆକୁ ଦଉଡ଼ିରେ ବାନ୍ଧି କୌଶଳକ୍ରମେ ଚାଲାଣ କରାଯାଉଥିବା ଜଣା ପଡ଼ିଥିଲା । ବୋଲେରୋରୁ ୧୪ ପ୍ୟାକେଟ ଗଞ୍ଜେଇ ଜବତ ସହ ଗଞ୍ଜେଇ ଚାଲାଣ ଅଭିଯୋଗରେ ବରଗଡ଼ ଜିଲ୍ଲା ପାଇକମାଳ ଅଞ୍ଚଳର ବିଧି ସାହୁକୁ ଗିରଫ କରାଯାଇଛି । କଣ୍ଟାମାଳ ଅଞ୍ଚଳରୁ ମଧ୍ଯପ୍ରଦେଶକୁ ବୋଲେରୋରେ ଗଞ୍ଜେଇ ଚାଲାଣ କରାଯାଉଥିବା ପୁଲିସ୍ ସୂଚନା ଦେଇଛି । ମାଜିଷ୍ଟ୍ରେଟଙ୍କ ଉପସ୍ଥିତିରେ ଜବତ ଗଞ୍ଜେଇ ଓଜନ କରାଯାଇଛି । ଅନ୍ୟପଟେ, ଅନ୍ୟ ଏକ ଗଞ୍ଜେଇ ଗାଡ଼ି ଫେରାର ହୋଇଯାଇଥିବା ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି ।
