ସମ୍ବଲପୁର: ସମ୍ବଲପୁରର ସୁନାପାଲି ଅଞ୍ଚଳରେ ଗତ ରବିବାର ଦିନ ମହିଳାମାନେ ବେଆଇନ ନିଶା କାରବାରକୁ ବିରୋଧ କରି ତୀବ୍ର ବିରୋଧ ପ୍ରଦର୍ଶନ ସହିତ ରାସ୍ତାରୋକ କରିଥିଲେ । ଏହି ପରିପ୍ରେକ୍ଷୀରେ ମଙ୍ଗଳବାର ଅତିରିକ୍ତ ଏସପି ଶ୍ରୀମନ୍ତ ବାରିକଙ୍କ ନେତୃତ୍ୱରେ ସଦର ଏସଡିପିଓ ତୁଫାନ ବାଗ, ଥାନା ଅଧିକାରୀ ଆଦିତ୍ୟ ମହାକୁର ଙ୍କ ସମେତ ଏକ ପୁଲିସ ଦଳ ସୁନାପାଲି ଅଞ୍ଚଳରେ ବେଆଇନ ବ୍ରାଉନସୁଗାର ସମେତ ବିଭିନ୍ନ ପ୍ରକାରର ମାଦକ ଦ୍ରବ୍ୟ ଧରିବା ଲକ୍ଷ୍ୟ ନେଇ ବ୍ୟାପକ ଖାନତଲାସି କରିଥିଲେ । ଏହି ସମୟରେ ସ୍ଥାନୀୟ ମହିଳା ମାନେ ଏହି ଚଢ଼ଉରେ ସହଯୋଗ କରିଥିଲେ ।
ସ୍ଥାନୀୟ ନିବାସୀଙ୍କ ଅନୁଯାୟୀ, ସୁନାପାଲି, ଭୂତାପଡା, ମୋତିଝରନ ଆଦି ଅଞ୍ଚଳରେ ବେଆଇନ ଭାବରେ ବ୍ରାଉନସୁଗାର, ଗଞ୍ଜେଇ, ମଦ ସମେତ ବିଭିନ୍ନ ପ୍ରକାରର ନିଶା ଦ୍ରବ୍ୟ ବିକ୍ରି ହେଉଥିବାରୁ ପ୍ରଶାସନ ଓ ପୁଲିସ ନିକଟରେ ଅଭିଯୋଗ କରାଯାଇଥିଲା । ଏହି ବେଆଇନ ନିଶା କାରବାର ପାଇଁ ଯୁବ ପିଢ଼ି ମାନେ ପଥଭ୍ରଷ୍ଟ ହେବା ସହିତ ଘର ଗୁଡିକ ଭାଙ୍ଗି ଗଲାଣି ।
ଏଥିପାଇଁ ଅନେକ ସମୟରେ ହତ୍ୟା, ମାଡପିଟ ଆଦି ବିଭିନ୍ନ ପ୍ରକାରର ଅପରାଧିକ ଘଟଣା ଗୁଡିକ ଘଟୁଛି । ଏଣୁ ମହିଳା ମାନେ ଏହାକୁ ବନ୍ଦ କରିବାକୁ ଅଣ୍ଟା ଭିଡି ସମ୍ମୁଖକୁ ଆସିଛନ୍ତି । ଏ ସମ୍ପର୍କରେ ଅତିରିକ୍ତ ଏସପି ଶ୍ରୀମନ୍ତ ବାରିକ କହିଛନ୍ତି ଯେ, ଅପରେସନ ପ୍ରହାର ସମୟରେ ଏହି ଅଞ୍ଚଳରେ ବ୍ୟାପକ ଚଢ଼ଉ କରାଯାଇଥିଲା । ୬ଟି ମାମଲା ରୁଜୁ କରାଯାଇ ସମୁଦାୟ ୧୫୧ ଗ୍ରାମ ବ୍ରାଉନସୁଗାର ଜବତ କରି ଅନେକ ବ୍ୟକ୍ତିଙ୍କୁ ଗିରଫ କରାଯାଇ ଜେଲ ହାଜତକୁ ପଠାଯାଇଛି ।
