ଭୁବନେଶ୍ୱର: ଓଡ଼ିଶା ମୁଖ୍ୟମନ୍ତ୍ରୀ ମୋହନ ମାଝୀ ଦେଶର ଶୀର୍ଷ ୧୦ ଜନପ୍ରିୟ ଏବଂ ଦକ୍ଷ ମୁଖ୍ୟମନ୍ତ୍ରୀଙ୍କ ତାଲିକାରେ ସ୍ଥାନ ପାଇଛନ୍ତି। ଇଣ୍ଡିଆ ଟୁଡେ ମୁଡ୍ ଅଫ୍ ଦି ନେସନ୍ ସର୍ବେକ୍ଷଣରେ ରାଜ୍ୟର ୩୪.୨ ପ୍ରତିଶତ ଲୋକ ମୁଖ୍ୟମନ୍ତ୍ରୀ ମୋହନ ମାଝୀଙ୍କ କାର୍ଯ୍ୟକୁ ପସନ୍ଦ କରିବା ପରେ ସେ ଅଷ୍ଟମ ସ୍ଥାନ ହାସଲ କରିଛନ୍ତି। ଏହି ତାଲିକାରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ୩୮.୧ ପ୍ରତିଶତ ସହିତ ସପ୍ତମ ସ୍ଥାନରେ ଥିବାବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ୩୦ ପ୍ରତିଶତ ସହିତ ନବମ ସ୍ଥାନରେ ଅଛନ୍ତି।
ଦୁଇ ଅଭିଜ୍ଞ ମୁଖ୍ୟମନ୍ତ୍ରୀଙ୍କ ମଧ୍ୟରେ ମୋହନ ମାଝୀଙ୍କ ସ୍ଥାନ ଏକ ଗୁରୁତ୍ୱପୂର୍ଣ୍ଣ ସଫଳତା। ଏହି ତାଲିକାରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ୪୪.୬ ପ୍ରତିଶତ ରେଟିଂ ସହିତ ଶୀର୍ଷରେ ଅଛନ୍ତି। ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁ ଦେବ ସାଇ ୪୧.୯ ପ୍ରତିଶତ ସହିତ ଦ୍ୱିତୀୟ ସ୍ଥାନରେ, ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ୪୧.୯ ପ୍ରତିଶତ ସହିତ ତୃତୀୟ ସ୍ଥାନରେ, ଭୁପେନ୍ଦ୍ର ପଟେଲ ୪୦.୭ ପ୍ରତିଶତ ସହିତ ଚତୁର୍ଥ ସ୍ଥାନରେ, ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ୪୦.୪ ପ୍ରତିଶତ ସହିତ ପଞ୍ଚମ ସ୍ଥାନରେ ଅଛନ୍ତି।
ମାତ୍ର ୧୪ ମାସର କାର୍ଯ୍ୟକାଳ ସମୟରେ ମୋହନ ଏଭଳି ସଫଳତା ହାସଲ କରିଛନ୍ତି। ସେ ତାଙ୍କର ସକ୍ରିୟ ଶାସନ ବ୍ୟବସ୍ଥା ଏବଂ ବିକାଶମୂଳକ ପଦକ୍ଷେପ ପାଇଁ ଓଡ଼ିଶାବାସୀଙ୍କଠାରୁ ବ୍ୟାପକ ପ୍ରଶଂସା ପାଇଛନ୍ତି। ୧୦ରୁ ଅଧିକ ଲୋକସଭା ଆସନ ବିଶିଷ୍ଟ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ନେଇ ଏହି ସର୍ଭେ କରାଯାଇଥିଲା, ଯେଉଁଥିରେ ସାରା ଦେଶରେ ମୁଖ୍ୟମନ୍ତ୍ରୀମାନଙ୍କ ପ୍ରତି ରହିଥିବା ଜନଭାବନା ଏବଂ କାର୍ଯ୍ୟଦକ୍ଷତା ଧାରଣା ପ୍ରତିଫଳିତ ହୋଇଛି।
