ନୂଆଦିଲ୍ଲୀ: ସ୍ବାଧୀନତାପ୍ରାପ୍ତିର ଦୀର୍ଘ ୭୮ ବର୍ଷ ପରେ ନୂଆଦିଲ୍ଲୀସ୍ଥ ସାଉଥ୍ ବ୍ଲକରେ ଥିବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସ୍ଥାନାନ୍ତର ହେବାକୁ ଯାଉଛି। ଆସନ୍ତା ସେପ୍ଟେମ୍ବରରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ନବନିର୍ମିତ ସେଣ୍ଟ୍ରାଲ ଭିଷ୍ଟା ଏକ୍କ୍ଲେଭକୁ ସ୍ଥାନାନ୍ତର କରାଯିବ ବୋଲି ଜଣାପଡିଛି। ପ୍ରଧାନମନ୍ତ୍ରୀଙ୍କ ଏହି କାର୍ଯ୍ୟାଳୟ ତାଙ୍କର ୭, ଲୋକକଲ୍ୟାଣ ମାର୍ଗସ୍ଥିତ ସରକାରୀ ବାସଭବନର ନିକଟବର୍ତ୍ତୀ ହେବ ବୋଲି କୁହାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିକଟରେ ସେଣ୍ଟ୍ରାଲ ଭିଷ୍ଟା ପ୍ରକଳ୍ପକୁ ଉଦ୍ଘାଟନ କରିଛନ୍ତି। ଏଠାରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ବ୍ୟତୀତ ଅନ୍ୟ କେତେକ ମନ୍ତ୍ରଣାଳୟ ମଧ୍ୟ କାର୍ଯ୍ୟ କରିବ।
ସୂଚନାଯୋଗ୍ୟ ବ୍ରିଟିଶ ଅମଳରୁ ରାଇସିନା ହିଲ୍ସସ୍ଥିତ ଜନପଥର ଦୁଇ ପାର୍ଶ୍ବରେ ସାଉଥ୍ ବ୍ଲକ ଓ ନର୍ଥ ବ୍ଲକ ଅବସ୍ଥିତ। ବର୍ତ୍ତମାନ ସାଉଥ୍ ବ୍ଲକରେ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ବ୍ୟତୀତ ପ୍ରତିରକ୍ଷା ଓ ବିଦେଶ ମନ୍ତ୍ରଣାଳୟ କାର୍ଯ୍ୟ କରୁଛି। ନର୍ଥ ବ୍ଲକରେ ଅର୍ଥ ଓ ସ୍ବରାଷ୍ଟ୍ର ମନ୍ତ୍ରଣାଳୟ କାର୍ଯ୍ୟ କରୁଛି। ଅପରପକ୍ଷରେ ସାଉଥ୍ ଓ ନର୍ଥ ବ୍ଲକରେ ଥିବା ଏହି ମନ୍ତ୍ରଣାଳୟଗୁଡିକୁ ସଂଗ୍ରହାଳୟରେ ପରିଣତ କରିବାକୁ ଯୋଜନା ରହିଛି।
