ସମାଜ ଡିଜିଟାଲ ଡେସ୍କ: ବଲିଉଡ଼ ଅଭିନେତା ରଣବୀର ସିଂହ ରବିବାର ତାଙ୍କ ୪୦ତମ ଜନ୍ମଦିନ ପାଳନ କରୁଛନ୍ତି। ଏହି ଅବସରରେ ନିଜ ପ୍ରଶଂସକଙ୍କୁ ଏକ ବଡ଼ ଉପହାର ଦେଇଛନ୍ତି ଅଭିନେତା। ରଣବୀରଙ୍କ ବହୁପ୍ରତୀକ୍ଷିତ ଚଳଚ୍ଚିତ୍ର ‘ଧୁରନ୍ଧର’ର ଟିଜର ଆଜି ରିଲିଜ୍ କରାଯାଇଛି। ଟିଜରରେ ରଣବୀର ସିଂହ ଦମଦାର ଲୁକ୍ରେ ନଜର ଆସିଛନ୍ତି। ଟିଜରରେ ତାଙ୍କ ଲୁକ୍ଠାରୁ ଆରମ୍ଭ କରି ଆକ୍ସନ୍ ପର୍ଯ୍ୟନ୍ତ, ସବୁକିଛି ବେଶ୍ ଆକର୍ଷଣୀୟ ଦେଖାଯାଉଛି। ଟିଜର ରିଲିଜ୍ ହେବାପରେ ପ୍ରଶଂସକମାନେ ରଣବୀରଙ୍କ ଫିଲ୍ମ ପାଇଁ ଆହୁରି ଅଧିକ ଉତ୍ସାହିତ ହୋଇଯାଇଛନ୍ତି।
୨ ମିନିଟ୍ ୩୯ ସେକେଣ୍ଡର ଏହି ଟିଜରଟି ଆର ମାଧବନଙ୍କ କଣ୍ଠ ସ୍ଵରରୁ ଆରମ୍ଭ ହେଉଛି। ଟିଜରରୁ ଜଣାପଡ଼ୁଛି ଯେ, ଫିଲ୍ମର କାହାଣୀ ଏକ ଗୁପ୍ତ ମିଶନ ଉପରେ ଆଧାରିତ। ଯେଉଁଥିରେ ରଣବୀର ସିଂହ ସମ୍ଭବତଃ ଜଣେ ଗୁପ୍ତ ଏଜେଣ୍ଟ ଭୂମିକାରେ ଅଭିନୟ କରିଛନ୍ତି। ଟିଜରରେ ଫିଲ୍ମର ଅନ୍ୟ କଳାକାରମାନେ ମଧ୍ୟ ନଜର ଆସିଛନ୍ତି। ଏଥିରେ ଆର ମାଧବନ, ଅକ୍ଷୟ ଖାନ୍ନା, ସଞ୍ଜୟ ଦତ୍ତ ଏବଂ ଅର୍ଜୁନ ରାମପାଲଙ୍କ ଝଲକ୍ ମଧ୍ୟ ଦେଖିବାକୁ ମିଳିଛି।
ଟିଜରରେ ରଣବୀର ସିଂହଙ୍କ ଦମଦାର ଷ୍ଟାଇଲ୍ ବ୍ୟତୀତ ଯଦି କେହି ତାଙ୍କ ଲୁକ୍ ଦ୍ଵାରା ସଭିଙ୍କୁ ଚମକାଇ ଦେଇଛନ୍ତି, ସେ ହେଉଛନ୍ତି ଆର ମାଧବନ। ଟିଜରରେ ମାଧବନଙ୍କୁ ଚିହ୍ନିବା ମଧ୍ୟ କଷ୍ଟକର। ସେ କୋଟ୍-ପ୍ୟାଣ୍ଟ ପିନ୍ଧି ଏବଂ ଚନ୍ଦା ଲୁକ୍ରେ ନଜର ଆସିଛନ୍ତି। ତାଙ୍କ ଲୁକ୍ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସହ ମେଳ ଖାଉଛି। ଏହା ବ୍ୟତୀତ ଟିଜରରେ ଅକ୍ଷୟ ଖାନ୍ନାଙ୍କ ଲୁକ୍ ମଧ୍ୟ ବେଶ୍ ଦମଦାର ଦେଖାଯାଉଛି। ‘ଛାଭା’ରେ ଔରଙ୍ଗଜେବ ପରେ ଅକ୍ଷୟ ଖାନ୍ନା ପୁଣି ଥରେ ତାଙ୍କ ଲୁକ୍ରେ ଖୁବ୍ ପ୍ରଭାବିତ କରୁଛନ୍ତି।
