ସମାଜ ଡିଜିଟାଲ ଡେସ୍କ: ପହଲଗାଓଁରେ ଘଟିଥିବା ଆତଙ୍କବାଦୀ ଆକ୍ରମଣର କଡ଼ା ଜବାବ ଦେଇଛି ଭାରତ। ଭାରତର ଏହି ପଦକ୍ଷେପକୁ ଜର୍ମାନୀ ଦୃଢ଼ ସମର୍ଥନ ଜଣାଇଛି। ଜର୍ମାନୀର ବିଦେଶ ମନ୍ତ୍ରୀ ଜୋହାନ ଓ୍ବେଡଫୁଲ୍ ଆତଙ୍କୀ ଆକ୍ରମଣକୁ କଡ଼ା ଶବ୍ଦରେ ନିନ୍ଦା କରି କହିଛନ୍ତି, ଭାରତକୁ ଆତଙ୍କବାଦ ବିରୋଧରେ ଆତ୍ମରକ୍ଷା କରିବାର ସମ୍ପୂର୍ଣ୍ଣ ଅଧିକାର ରହିଛି।
ଓ୍ବେଡଫୁଲ୍ କହିଛନ୍ତି, ଏପ୍ରିଲ ୨୨ରେ ପହଲଗାଓଁରେ ଘଟିଥିବା ଆତଙ୍କୀ ଆକ୍ରମଣରେ ଆମେ ସ୍ତବ୍ଧ। ଭାରତକୁ ନିଶ୍ଚିତ ରୂପେ ଆତଙ୍କବାଦ ବିରୋଧରେ ନିଜର ରକ୍ଷା କରିବାର ପୂରା ଅଧିକାର ରହିଛି।
ସେ ଆହୁର କହିଛନ୍ତି ଯେ, ଭାରତ ଏବଂ ଜର୍ମାନୀ ମଧ୍ୟରେ ଆତଙ୍କ ବିରୋଧୀ ସହଯୋଗ ଦିଗରେ ନିୟମିତ ଆଲୋଚନା ଜାରି ରହିଛି। ଆଗାମୀ ଦିନରେ ଏହାକୁ ଅଧିକ ମଜଭୁତ କରାଯିବ।
ଭାରତର ବୈଦେଶିକ ମନ୍ତ୍ରୀ ଏସ. ଜୟଶଙ୍କର ୟୁରୋପ ଗସ୍ତରେ ଅଛନ୍ତି। ୟୁରୋପର ୩ଟି ଦେଶକୁ ସେ ଗସ୍ତ କରିବାର କାର୍ଯ୍ୟକ୍ରମ ରହିଛି। ଜର୍ମାନୀ ପୂର୍ବରୁ ଜୟଶଙ୍କର ବର୍ଲିନ ଯାଇଥିଲେ, ଯେଉଁଠାରେ ସେ ଆତଙ୍କବାଦକୁ ଭାରତ ବରଦାସ୍ତ କରିବ ନାହିଁ ବୋଳି କହିଥିଲେ। ଭାରତ କେବେ ବି ପରମାଣୁ ବ୍ଲାକମେଲ ଆଗରେ ମୁଣ୍ଡ ନୁଆଁଇବ ନାହିଁ ବୋଲି ସେ ସ୍ପଷ୍ଟ କରିଥିଲେ।
