ଲିକ୍ ହେଲା ‘ଏକ୍ ଲଡ଼କୀ କୋ ଦେଖା ତୋ ଐସା ଲଗା’ ଚଳଚ୍ଚିତ୍ର
ମୁମ୍ବଇ : ଗତ ଶୁକ୍ରବାର ମୁକ୍ତିଲାଭ କରିଥିବା ଚଳଚ୍ଚିତ୍ର ‘ଏକ୍ ଲଡ଼କୀ କୋ ଦେଖା ତୋ ଐସା ଲଗା’ ଅନ୍ ଲାଇନ୍ ଲିକ୍ ହୋଇଯାଇଛି। ସଦ୍ୟ ମୁକ୍ତିଲାଭ କରୁଥିବା ଚଳଚ୍ଚିତ୍ରଗୁଡ଼ିକୁ ଲିକ୍ କରୁଥିବା ଚର୍ଚ୍ଚିତ ୱେବସାଇଟ୍ ତାମିଲ ରକର୍ସ ଏହି ଚଳଚ୍ଚିତ୍ରକୁ ଲିକ୍ କରିଥିବା ଜଣାପଡ଼ିଛି। ପୂର୍ବରୁ ଏହି ୱେବସାଇଟ୍ ଅନେକ ତାମିଲ ଓ ହିନ୍ଦୀ ଚଳଚ୍ଚିତ୍ରକୁ ଲିକ୍ କରିଆସୁଛି ଓ ନିକଟରେ ଏହା ‘ଦି ଆକ୍ସିଡେଣ୍ଟାଲ ପ୍ରାଇମ ମିନିଷ୍ଟର’ ଓ ‘ମଣିକର୍ଣ୍ଣିକା’ ଭଳି ଚଳଚ୍ଚିତ୍ରକୁ ମଧ୍ୟ ଲିକ୍ କରିଥିଲା। ତେବେ ଏହାଦ୍ୱାରା ଚଳଚ୍ଚିତ୍ରର ବ୍ୟବସାୟ ବହୁମାତ୍ରାରେ ପ୍ରଭାବିତ ହେଉଛି। ତାମିଲ ରକର୍ସ ବିରୋଧରେ ପୂର୍ବରୁ ବହୁବାର ପଦକ୍ଷେପ ନିଆ ଯାଇଥିଲେ ମଧ୍ୟ ଏହି ୱେବସାଇଟ୍ ରେ ଲଗାତାର ଚଳଚ୍ଚିତ୍ର ଲିକ୍ ହେବାରେ ଲାଗିଛି।
ସୋନମ କପୁର, ଅନିଲ କପୁର ଓ ରାଜକୁମାର ରାଓଙ୍କ ଅଭିନୀତ ‘ଏକ୍ ଲଡ଼କୀ କୋ ଦେଖା ତୋ ଐସା ଲଗା’ ଚଳଚ୍ଚିତ୍ର ବକ୍ସ ଅଫିସରେ କିଛି ଖାସ୍ ବ୍ୟବସାୟ କରୁନଥିବା ଜଣାପଡ଼ିଛି। ପ୍ରାୟ ୩୫ କୋଟି ବଜେଟ୍ ରେ ନିର୍ମିତ ଏହି ଚଳଚ୍ଚିତ୍ର ପ୍ରଥମ ଦିନରେ ପ୍ରାୟ ୩ କୋଟି ଟଙ୍କା ଆୟ କରିଥିବା ବେଳେ ଦ୍ୱିତୀୟ ଦିନରେ ୪ କୋଟି ୯୧ ଲକ୍ଷ ଟଙ୍କା ଆୟ କରିଛି। ଏଭଳି ସ୍ଥିତିରେ ଚଳଚ୍ଚିତ୍ର ଲିକ୍ ହେବା ଫଳରେ ଏହାର ବ୍ୟବସାୟ ଉପରେ ପ୍ରଭାବ ପଡ଼ିବାର ଆଶଙ୍କା ରହିଛି।