ହାମିଲଟନ : ସୁଜି ବେଟ୍ସ ଓ ଅଧିନାୟିକା ଆମି ସାଟର୍ଥୱେଟ୍ଙ୍କ ଅର୍ଦ୍ଧଶତକ ବଳରେ ଘରୋଇ ନ୍ୟୁଜିଲାଣ୍ଡ ଏଠାରେ ଶୁକ୍ରବାର ଖେଳାଯାଇଥିବା ତୃତୀୟ ତଥା ଅନ୍ତିମ ମହିଳା ଦିନିକିଆ କ୍ରିକେଟ ମ୍ୟାଚରେ ଭାରତକୁ ୮ ୱିକେଟରେ ପରାସ୍ତ କରିଛି। ପରାଜୟ ସତ୍ତ୍ବେ ଭାରତ ଏହି ତିନିଟିକିଆ ସିରିଜକୁ ୨-୧ରେ ହାତେଇ ନେଇଛି। ଟସ୍ରେ ହାରି ପ୍ରଥମେ ବ୍ୟାଟିଂ ନିର୍ଦେଶ ପାଇଥିବା ଭାରତ ଦିପ୍ତୀ ଶର୍ମାଙ୍କ ଅର୍ଦ୍ଧଶତକ (୫୨) ଓ ହରମନପ୍ରୀତ କୌରଙ୍କ ୨୪ ରନ ବଳରେ ୪୪ ଓଭରରେ ୧୪୯ ରନରେ ଅଲଆଉଟ ହୋଇଥିଲା। ନ୍ୟୁଜିଲାଣ୍ଡ ପକ୍ଷରୁ ଆନ୍ନା ପିଟରସନ ୪ଟି ୱିକେଟ ଅକ୍ତିଆର କରିଥିବାବେଳେ ଲିଆ ତାହୁହୁ ୩ଟି ଓ ଆମେଲିଆ କେର୍ ୨ଟି ୱିକେଟ ପାଇଥିଲେ।
୧୫୦ ରନ୍ର ଲକ୍ଷ୍ୟକୁ ପିଛା କରିବାକୁ ଯାଇ ନ୍ୟୁଜିଲାଣ୍ଡ ୨୨ ରନରେ ଓପନର ଲରେନ ଡାଉନଙ୍କ (୧୦) ୱିକେଟ ହରାଇଥିଲା। ତେବେ ସୁଜି ବେଟ୍ସ ଓ ଆମି ସାଟର୍ଥୱେଟ୍ ୨ୟ ୱିକେଟ ପାଇଁ ୮୪ ରନ ଯୋଗକରି ଦଳୀୟ ବିଜୟକୁ ନିଶ୍ଚିତ କରିଥିଲେ। ବେଟ୍ସ ବ୍ୟକ୍ତିଗତ ୫୭ ରନ କରି ଦ୍ବିତୀୟ ଖେଳାଳିଭାବେ ଆଉଟ ହୋଇଥିଲେ। ସାଟର୍ଥୱେଟ୍ ଓ ସୋଫି ଡିଭାଇନ ୩ୟ ୱିକେଟ ପାଇଁ ଅବିଭାଜିତ ୪୭ ରନ ସଂଗ୍ରହ କରିଥିଲେ। ଫଳରେ ନ୍ୟୁଜିଲାଣ୍ଡ ୨୯.୨ ଓଭରରେ ୨ ୱିକେଟ ବିନିମୟରେ ୧୫୩ ରନ କରି ବିଜୟୀ ହୋଇଥିଲା। ସାଟର୍ଥୱେଟ୍ ୬୬ ଓ ଡିଭାଇନ୍ ୧୭ ରନରେ ଅପରାଜିତ ଥିଲେ। ଭାରତ ପକ୍ଷରୁ ପୁନମ ଯାଦବ ଗୋଟିଏ ୱିକେଟ ଅକ୍ତିଆର କରିଥିଲେ। ଆନ୍ନା ପିଟରସନ ‘ପ୍ଲେୟାର ଅଫ୍ ଦି ମ୍ୟାଚ’ ବିବେଚିତ ହୋଇଥିଲେ।
