ରାୟଗଡ଼ା : ରାୟଗଡ଼ା ଜିଲା ଶେଷଖାଲ ଥାନା ଅନ୍ତର୍ଗତ ବଡହଂସା ନାଗାବଳୀ ନଦୀ ବାଲି ଘାଟରେ ବେଆଇନ ବାଲି ଖନନବେଳେ ପୁଲିସର ଚଢ଼ାଉ । ନଦୀ ଗର୍ଭରୁ ବାଲି ଖନନ କରୁଥିବା ଗୋଟିଏ ପ୍ରୋକଲିନ ମେସିନ ସହିତ ଦୁଇଟି ଟିପ୍ପର ଜବତ କରିବା ସହ ୪ ଜଣଙ୍କୁ ଗିରଫ କରିଛି ଶେଷଖାଲ ଥାନା ପୁଲିସ। ଗିରଫ ବ୍ୟକ୍ତିମାନେ ହେଲେ ବାଲି ଘାଟ ଲିଜଧାରୀଙ୍କ ସୁପରଭାଇଜର ସୁରେଶ ମେଲେକା, ପ୍ରୋକଲିନ ଡ୍ରାଇଭର ଦୟା କୁମ୍ଭାର, ଟିପର ଡ୍ରାଇଭର ଗୋପାଳ ଗୌଡ ଓ ଲୋକନାଥ ମାଝୀ। ପୁଲିସ ସୂତ୍ରରୁ ପ୍ରକାଶ ଯେ, ଭୋର ସମୟରେ ନାଗାବଳୀ ନଦୀର ବଡହଂସା ଘାଟରେ ପ୍ରୋକଲିନ ମେସିନ ଲଗାଇ ବାଲି ଖନନ ହେଉଥିଲା। ଏହି ବାଲି ଆନ୍ଧ୍ରପ୍ରଦେଶ ଚାଲାଣ ପାଇଁ ଖନନ କରାଯାଉଥିଲା। ଏ ସଂପର୍କରେ ଖବର ପାଇ ଶେଷଖାଲ ଥାନା ପୁଲିସ ସେଠାରେ ଚଢ଼ଉ କରି ନଦୀ ଗର୍ଭରୁ ପ୍ରୋକଲିନ ମେସିନ ସହିତ ଦୁଇଟି ଟିପର ଜବତ କରି ଥାନାକୁ ଆଣିଥିଲା। ଏନେଇ ଶେଷଖାଲ ଥାନାରେ ଏକ ମାମଲା ରୁଜୁ କରି ପୁଲିସ ତଦନ୍ତ କରୁଛି । ପୁଲିସ କାର୍ଯ୍ୟାନୁଷ୍ଠାନ ନେଉଛି ହେଲେ କର୍ମଚାରୀ ଅଭାବ ଆଳ ଦେଖାଇ ହାତ ବାନ୍ଧି ବସିଛି ଜିଲା ଖଣି ବିଭାଗ ଅଧିକାରୀମାନେ। ବଡହଂସା ବାଲି ଘାଟ ଲିଜଧାରୀ ବିଭିନ୍ନ ସମୟରେ ନିୟମ ଉଲ୍ଲଙ୍ଘନ କରି ମେସିନ ଲଗାଇ ବାଲି ଉତ୍ତୋଳନ କରୁଥିବା ଅଭିଯୋଗ ହେଉଥିଲେ ମଧ୍ୟ ଲିଜଧାରୀଙ୍କ ବିରୋଧରେ କୌଣସି ପଦକ୍ଷେପ ଗ୍ରହଣ କରୁନି ଜିଲା ଖଣି ବିଭାଗ । ଫଳରେ ଲିଜଧାରୀ ବାରମ୍ବାର ମେସିନ ଲଗାଇ ନଦୀ ଗର୍ଭରୁ ବାଲି ଖନନ କରୁଛନ୍ତି । ଲିଜଧାରୀଙ୍କୁ ଖଣି ବିଭାଗୀୟ ଅଧିକାରୀଙ୍କ ଅହେତୁକ ଅନୁକମ୍ପାର ତଦନ୍ତ ଦାବି ହେଉଛି ।
Comments are closed.