ନୂଆଦିଲ୍ଲୀ: ଟ୍ବେଣ୍ଟି୨୦ କ୍ରିକେଟରେ ଭାରତୀୟ ଭାବେ ଦ୍ରୁତତମ ଶତକ ହାସଲ କରିବାରେ ଗୁଜରାଟର ଉର୍ବିଲ ପଟେଲଙ୍କ ସହ ପଞ୍ଜାବ ଅଧିନାୟକ ଅଭିଷେକ ଶର୍ମା ସମକକ୍ଷ ହୋଇଛନ୍ତି। ଉର୍ବିଲ ୨୮ଟି ବଲରୁ ଶତକ ହାସଲ କରିଥିଲେ। ଅଭିଷେକ ଗୁରୁବାର ରାଜକୋଟ୍ରେ ସୟଦ ମୁସ୍ତାକ ଅଲୀ ଟ୍ବେଣ୍ଟି୨୦ରେ ମେଘାଳୟ ବିପକ୍ଷରେ ୨୯ଟି ବଲରୁ ୧୦୬ରନ କରିଥିଲେ। ସେଥିମଧ୍ୟରୁ ଅଭିଷେକ ୨୮ଟି ବଲରୁ ୧୧ଟି ଛକା ଓ ୮ଟି ଚୌକା ସହ ଶତକ ପୂରଣ କରିଥିଲେ। ପୂର୍ବରୁ ଉର୍ବିଲ ଇନ୍ଦୋରରେ ତ୍ରିପୁରା ବିପକ୍ଷରେ ୨୮ଟି ବଲରୁ ଶତକ ହାସଲ କରିଥିଲେ। ଯାହା ଟ୍ବେଣ୍ଟି୨୦ କ୍ରିକେଟରେ ଦ୍ବିତୀୟ ଦ୍ରୁତତମ ଶତକ ରହିଥିଲା।
ଏହା ସହିତ ଅଭିଷେକ ସମକକ୍ଷ ହୋଇଛନ୍ତି। ମେଘାଳୟ ୭ ୱିକେଟ ହରାଇ ୧୪୨ରନ କରିଥିଲା। ଜବାବରେ ପଞ୍ଜାବ ଅଭିଷେକଙ୍କ ୧୦୬ ରନ ବଳରେ ୯.୩ ଓଭର ଖେଳି ୩ ୱିକେଟ ହରାଇ ବିଜୟୀ ହୋଇଥିଲା। ସୂଚନାଯୋଗ୍ୟ, ଭାରତୀୟ ୱିକେଟ୍ ରକ୍ଷକ ବ୍ୟାଟ୍ସମ୍ୟାନ ଋଷଭ ପନ୍ତ୍ ୨୦୧୮ ଜାନୁଆରୀରେ ଦିଲ୍ଲୀ ପକ୍ଷରୁ ଖେଳି ହିମାଚଳ ପ୍ରଦେଶ ବିପକ୍ଷରେ ଟ୍ବେଣ୍ଟି୨୦ରେ ୩୨ଟି ବଲରୁ ଶତକ ହାସଲ କରିଥିଲେ। ଯାହା ଭାରତୀୟ ଭାବେ ଟ୍ବେଣ୍ଟି୨୦ରେ ଦ୍ରୁତତମ ଶତକ ରହିଥିଲା।
ଉକ୍ତ କୀର୍ତ୍ତିମାନକୁ ଉର୍ବିଲ ଗତ ୨୭ରେ ଭାଙ୍ଗିବାରେ ସଫଳ ହୋଇଥିଲେ। ଟ୍ବେଣ୍ଟି୨୦ରେ ଅନ୍ୟ ଭାରତୀୟଙ୍କ ମଧ୍ୟରେ ରୋହିତ ଶର୍ମା ୩୫ଟି ବଲରୁ ଓ ୟୁସୁଫ ପଠାନ ୩୭ଟି ବଲରୁ ଶତକ ହାସଲ କରିଛନ୍ତି। ଗତ ଜୁନରେ ସାଇପ୍ରସ ବିପକ୍ଷରେ ଇଷ୍ଟୋନିଆର ସାହିଲ ଚୌହ୍ବାନ ୨୭ଟି ବଲରୁ ଶତକ ହାସଲ କରିଥିଲେ। ଯାହା ଏବେ ସୁଦ୍ଧା ଦ୍ରୁତତମ ଟ୍ବେଣ୍ଟି୨୦ ଶତକର କୀର୍ତ୍ତିମାନ ରହିଛି।
