ସମାଜ ଡିଜିଟାଲ ଡେସ୍କ: ଏଣିକି ବ୍ୟାଙ୍କ ଠକେଇର ମିଳିତ ତଦନ୍ତ ହେବ। କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ) ଏବଂ ଭାରତୀୟ ରିଜର୍ଭ ବ୍ୟାଙ୍କ(ଆରବିଆଇ) ମିଳିତ ଭାବେ ଠକେଇର ତଦନ୍ତ କରିବେ। ଦେଶର ଅନ୍ୟ ଛୋଟ ଛୋଟ ବ୍ୟାଙ୍କଗୁଡ଼ିକ ଏଥିରେ ସହଯୋଗ କରିବେ। ଏ ନେଇ ଅର୍ଥ ମନ୍ତ୍ରଣାଳୟର ଆର୍ଥିକ ସେବା ବିଭାଗ (ଡିଏଫଏସ) ପକ୍ଷରୁ ଫ୍ରସ୍ତାବ ଦିଆଯାଇଛି। ତଦନ୍ତକୁ ତ୍ଵରିତ କରିବା ଲାଗି ବ୍ୟାଙ୍କ ଏବଂ ସିବିଆଇ ମଧ୍ୟରେ ନିୟମିତ ଆଲୋଚନା ପାଇଁ ବ୍ୟବସ୍ଥା କରିବାକୁ ପ୍ରସ୍ତାବରେ କୁହାଯାଇଛି। ଆରବିଆଇ, ସ୍ଵରାଷ୍ଟ୍ର ମନ୍ତ୍ରଣାଳୟ ଏବଂ ଅନ୍ୟାନ୍ୟ ଭାଗିଦାରିଙ୍କ ମଧ୍ୟରେ ଅନୁଷ୍ଠିତ ବୈଠକରେ ଏ ସମ୍ପର୍କରେ ଆଲୋଚନା ହୋଇଛି।
ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ବ୍ୟାଙ୍କ ଠକେଇ ମାମଲାର ତଦନ୍ତ ସମୟରେ ସିବିଆଇ ପକ୍ଷରୁ ଯେଉଁ ତଥ୍ୟ ମଗାଯାଉଛି ତାହାକୁ ବ୍ୟାଙ୍କଗୁଡ଼ିକ ପକ୍ଷରୁ ଯାଞ୍ଚ କରାଯାଉଛି। ବ୍ୟାଙ୍କ ଏବଂ ସିବିଆଇ ମଧ୍ୟରେ ସମନ୍ବୟ ରକ୍ଷା ପାଇଁ ଏକ ପ୍ଲାଟଫର୍ମ ପ୍ରସ୍ତୁତ କରିବାକୁ ଆଲୋଚନା ହୋଇଛି। ଠକେଇ ଘଟଣାରେ ସିବିଆଇ ନିକଟରେ କିପରି ଅଭିଯୋଗ ଦାଖଲ କରାଯିବ, ତଦନ୍ତର ନିୟମିତ ସମୀକ୍ଷା ଏବଂ ତଦନ୍ତ ସମୟରେ ବ୍ୟାଙ୍କଗୁଡ଼ିକଠାରୁ ସିବିଆଇ ଦରକାର କରୁଥିବା ସମସ୍ତ ପ୍ରକାର ସହଯୋଗ ଉପରେ ମଧ୍ୟ ଆଲୋଚନା କରାଯାଇଛି ବୋଲି ମନ୍ତ୍ରଣାଳୟ ପକ୍ଷରୁ ଏକ ବିବୃତିରେ କୁହାଯାଇଛି।
