ସମ୍ବିଧାନର ଉଦ୍ଦେଶିକାରୁ ‘ସମାଜବାଦୀ’ ଓ ‘ଧର୍ମନିରପେକ୍ଷ’ ଶବ୍ଦ ହଟାଇବାକୁ ମନା କଲେ ସୁପ୍ରିମକୋର୍ଟ

ସମାଜ ଡିଜିଟାଲ ଡେସ୍କ: ସମ୍ବିଧାନର ଉଦ୍ଦେଶିକାରୁ ‘ସମାଜବାଦୀ’ ଏବଂ ‘ଧର୍ମନିରପେକ୍ଷ’ ଶବ୍ଦ ହଟାଇବାକୁ ମନା କରିଛନ୍ତି ସୁପ୍ରିମକୋର୍ଟ। ପ୍ରଧାନ ବିଚାରପତି ସଞ୍ଜୀବ ଖାନ୍ନା ଏବଂ ବିଚାରପତି ସଞ୍ଜୟ କୁମାରଙ୍କୁ ନେଇ ଗଠିତ ଖଣ୍ଡପୀଠ ଏ ସଂକ୍ରାନ୍ତରେ ଆଗତ ଏକାଧିକ ପିଟିସନର ଶୁଣାଣି କରି ଏହି ରାୟ ଦେଇଛନ୍ତି। ଏହି ଦୁଇଟି ଶବ୍ଦ ସମ୍ବିଧାନର ଉଦ୍ଦେଶିକାରେ ଅନ୍ତର୍ଭୁକ୍ତ କରାଯିବାର ଅନେକ ବର୍ଷ ବିତିଗଲାଣି। ବର୍ତ୍ତମାନ ଏହି ପ୍ରସଙ୍ଗ କାହିଁକି ଉତ୍ଥାପନ କରାଯାଉଛି ବୋଲି ପ୍ରଧାନ ବିଚାରପତି କହିଛନ୍ତି।

ପୂର୍ବତନ ରାଜ୍ୟସଭା ସଦସ୍ୟ ସୁବ୍ରମନ୍ୟନ ସ୍ଵାମୀ, ଆଡଭୋକେଟ ବିଷ୍ଣୁ ଶଙ୍କର ଜୈନ ଏବଂ ଅନ୍ୟମାନଙ୍କ ପକ୍ଷରୁ ପିଟିସନ ଦାୟର କରାଯାଇଥିଲା। ଆବେଦନକାରୀମାନେ ସମ୍ବିଧାନର ଉଦ୍ଦେଶିକାରେ ‘ସମାଜବାଦୀ’ ଏବଂ ‘ଧର୍ମନିରପେକ୍ଷ’ ଶବ୍ଦର ଅନ୍ତର୍ଭୁକ୍ତିକରଣକୁ ଚ୍ୟାଲେଞ୍ଜ କରିଥିଲେ। ଜରୁରିକାଳୀନ ପରିସ୍ଥିତିରେ ୪୨ ତମ ସଂଶୋଧନରେ ଏହି ଶବ୍ଦ ଦ୍ଵୟ ଅନ୍ତର୍ଭୁକ୍ତ କରାଯିବା ଅସାମ୍ବିଧାନିକ। ସିଜେଆଇ ଖାନ୍ନା ସମସ୍ୟାକୁ ହୃଦବୋଧ କରିବା ସହିତ ଆବେଦନକାରୀମାନଙ୍କୁ ସ୍ମରଣ କରାଇ କହିଥିଲେ, ପୂର୍ବରୁ ୪୨ ତମ ସଂଶୋଧନର ନ୍ୟାୟିକ ଯାଞ୍ଚ ହୋଇସାରିଛି। ଧର୍ମନିରପେକ୍ଷତା ସମ୍ବିଧାନର ମୂଳ ପିଣ୍ଡର ଏକ ଅଂଶ। ଏହାକୁ ବଦଳାଯାଇପାରିବ ନାହିଁ।

ସୂଚନାଯୋଗ୍ୟ, ୧୯୭୬ ମସିହାରେ ଇନ୍ଦିରା ଗାନ୍ଧୀଙ୍କ ସରକାର ସମୟରେ ସମ୍ବିଧାନର ୪୨ତମ ସଂଶୋଧନ ଦ୍ଵାରା ‘ସମାଜବାଦୀ’, ‘ଧର୍ମନିରପେକ୍ଷ’ ଏବଂ ‘ସଂହତି’ ଶବ୍ଦକୁ ଉଦ୍ଦେଶିକାରେ ଅନ୍ତର୍ଭୁକ୍ତ କରାଯାଇଥିଲା।